Йөҙ йыллыҡ күпер яңыртылды

Дәүләкән районы хакимиәтенән хәбәр итеүҙәренсә, Дәүләкәндә Пролетар һәм Ворошилов урамдарын тоташтырған Мораҙым йылғаһы аша күперҙе нығытыу эштәре тамамланды. Ремонт Рәсәй Президенты Владимир Путиндың май указы менән раҫланған “Торлаҡ һәм ҡала мөхите” милли проектының “Уңайлы ҡала мөхите булдырыу” федераль программаһы нигеҙендә урындағы бюджет аҡсаһы иҫәбенә яһалды.

Мәғлүм булыуынса, күпер йөҙ йылдан ашыу элек һалынған һәм бер нисә тапҡыр төҙөкләндерелгән. Әммә был юлы автомобилдәр хәүефһеҙ йөрөһөн өсөн ҡоролманы тотош нығытырға кәрәк ине. Яуаплы эште “Горкомсервис” муниципаль предприятиеһы белгестәре башҡарҙы. Әҙерлек этабында улар күперҙәге ҡоймаларҙы киҫеп алып, йәйәүлеләр юлын күсерҙе, төп конструкцияларҙы таҙартты, йылғаны тәрәнәйтте. Иҫке аркалы күперҙең ике яғына дүртәр рәт тимер-бетон блок һалып, металл өрлөктәр ҡуйҙылар, уларҙың өҫтөнә плитә түшәнеләр. Ҡоролманы белгестәр металл таяуҙар менән нығытты.

“Горкомсервис” етәксеһе Николай Юлков әйтеүенсә, предприятие коллективы алдына тәүге тапҡыр бындай ҡатмарлы бурыс ҡуйылды, шулай ҙа эшселәр уны уңышлы атҡарып сыҡты. Күпер ярайһы уҡ ҡыҫҡа ваҡыт эсендә реконструкцияланды.

#ВладимирПутин

#национальныепроекты#нацпроекты
#региональныепроекты#регпроекты#нацпроектыБашкортостан

Фото: srk.nationalpriority.ru/press_releases/173614

Сығанаҡ: СРК | Инфоповод (nationalpriority.ru)