Израиль күрһәткестәре – донъяла иң түбәне

Бөгөн Өфөлә, “Төбәктәрҙең инфекция хәүефһеҙлеген ойоштороуҙа заман технологиялары. COVID-19: яңы саҡырыу” Бөтә Рәсәй медицина форумында, Израилдәге “Horev Medical Centre” клиникаһы етәксеһе Роман Барак видеобәйләнеш аша был дәүләттә коронавирусҡа бәйле хәл менән таныштырҙы һәм ундағы дауалау алымдары хаҡында һөйләне.

Билдәле табип әйтеүенсә, Израилдә лә, тотош донъялағы кеүек, коронавирус менән көрәшеү дауам итә.

“Башҡортостандағы һымаҡ инфекция госпиталдәрен бөтә донъяла төҙөһәләр, был сирҙе күптән еңер инек. Әммә һәр дәүләттең үҙ алымдары һәм юлдары. Мәҫәлән, Израилдә махсус клиникалар төҙөмәнеләр. Ун миллион халыҡҡа 18 дәүләт медицина учреждениеһы бар, уларҙың һәр ҡайһыһында коронавирусҡа ҡаршы көрәшеү өсөн икешәр бүлек махсуслаштырылды. Израилдә ике миллион кеше сирҙе йоҡторған, һигеҙ мең кеше вафат, ни бары 100 кеше генә госпиталләштерелгән.

Беҙҙәге үлем күрһәткестәре донъяла иң түбәндәр иҫәбендә. Дауалау алымдарына килгәндә, ошо ике йыл эсендә иң мөһиме – сифатлы реанимация сараларын күреү, үлем осраҡтарын кәметеү икәнлегенә төшөндөк. Был йәһәттән беҙҙә медицина персоналы эше камиллаштырыла, белем кимәлен даими күтәрәләр”, - тине Роман Барак.

Ул, сиктәр асылғас, Башҡортостан вәкилдәре менән мотлаҡ осрашыуға ышаныс белдерҙе һәм һәр саҡ тәжрибә уртаҡлашыу яҡлы икәнлеген билдәләне.

Фото: "Башинформ", видеонан скриншот.