БДУ студенттары Рәсәй форумында ҡатнаша

Башҡорт дәүләт университетының башҡорт филологияһы, журналистика һәм шәрҡиәт факультеты заман менән бергә атлап, бихисап йүнәлештәр буйынса белгестәр әҙерләй.

Ошо көндәрҙә "Ғәмәли филология. Туризм. Гид-экскурсия ойоштороусы, тәржемәсе" йүнәлеше буйынса белем алған студенттар Рәсәйҙең иң ҙур туристик күргәҙмәһендә ҡатнаша. Туризм тармағы лидерҙары форумында бөгөнгө заман шарттарында туризм ҡағылышлы мәсьәләләр, Рәсәйҙә туризм баҙары трансформацияһының төп йүнәлештәре тикшерелгән, алдағы туристик миҙгелгә ҡарата прогноздар яһалған.

4-се курс студенты Вероника Юлчиева, 3-сө курс студенттары Алһыу Аксенова һәм Айһылыу Шәйхулова, туризм өлкәһенә ҡағылышлы уңышлы проекттар эшләп, MITT Академияла ҡатнашыу мөмкинлегенә эйә булған. Белем биреү семинарҙарының тәүге көнөндә улар туристик компания менән идара итеү үҙенсәлектәрен өйрәнгән. “Ҡатмарлы геосәйәси хәл-торошҡа ҡарамаҫтан, Рәсәйҙең 50 төбәгенең, шулай уҡ бихисап сит ил партнерҙарының күргәҙмә стендтары бик ҡыҙыҡлы булды, презентация программалары сараларға бай итеп эшләнгән ине”, - тип билдәләне ҙур форумда ҡатнашҡан студент ҡыҙҙар.

Бындай сараларҙа ҡатнашыу студенттарға белем даирәһен үҫтереүгә, үҙҙәре эшләйәсәк һөнәр һәм тармаҡ менән яҡындан танышырға мөмкинлек бирә. Бер үк ваҡытта әлеге ише башланғыстар ил Президенты В.В. Путиндың май указдары тарафынан раҫланған “Фән” милли проекты (национальный проект “Наука”) ҡуйған бурыстарҙы тормошҡа ашырыуға ла булышлыҡ итә.

Фотола: Рәсәй форумында ҡатнашҡан студенттар.

Фото: Г. Абдуллинаның социаль селтәрҙәге сәхифәһенән.

#ВладимирПутин
#национальныепроекты#нацпроекты
#региональныепроекты#регпроекты#нацпроектыБашкортостан