"Сәсмәй ҡалмаясаҡбыҙ!" - ти Сибай фермеры

Ауыл хужалығы бизнес өсөн иң отошло йүнәлештәрҙең береһе булып тора. Аҙыҡ-түлеккә ихтыяж бер ҡасан да бөтмәйәсәк, тимәк, фермерҙар эшһеҙ ҡалмаясаҡ.

 

Сибай ҡалаһында 2007 йылдан алып ауыл хужалығы предприятиеһы - "Степная" агрофирмаһы яуаплылығы сикләнгән йәмғиәте (директоры - Азамат Мәхмүтов) эшләй. Иген культураларынан бойҙай, арпа, етен үҫтереү эшмәкәрлектең төп йүнәлеше булып тора. “Бәләкәй һәм урта эшҡыуарлыҡ һәм шәхси эшҡыуарлыҡ башланғыстарына булышлыҡ итеү” (национальный проект "Малое и среднее предпринимательство и поддержка индивидуальной предпринимательской инициативы") милли проектына ярашлы, "Степная" яуаплылығы сикләнгән йәмғиәтенә Төйәләҫ ҡасабаһындағы Мәктәп урамында бина бирелә. Предприятиела дүрт эш урыны булдырыла, шулай уҡ 12 кеше миҙгел эштәре ваҡытында килешеү буйынса хеҙмәт күрһәтә. Киләсәктә даими эш урындарын арттырыу күҙаллана. Фермерҙың бер нисә берәмек техникаһы бар. Мәҫәлән, тиҙҙән баҫыуға "Buhler" тракторы, "VERSATILE" сәсеү комплексы һ.б. кәрәкле техника сығасаҡ. Бөтәһе 1250 гектар майҙанда иген культуралары сәсеү ҡаралған. Киләсәктә малсылыҡ йүнәлешендә лә инвестиция проектын ғәмәлгә ашырыу планлаштырыла. Предприятие герефорд тоҡомло һыйыр малы, мал аҙығы таратыу, тейәү техникалары һатып алған.  

 

"Ауырлыҡтарға ҡарамай, сәсеүҙе ваҡытында атҡарып сығырға ниәт. Игенсе өсөн һәр йыл һынау ҡуя, бер нисә йыл ҡоролоҡ һөҙөмтәһендә уңыштың күбеһе юҡҡа сыҡты. Санкцияларға бәйле проблемалар барлыҡҡа килеүе мөмкин, "Bourgault" сәсеү комплексы Канадала сыҡҡан, запас частар менән ҡытыршылыҡтар булыуы ихтимал. Шулай ҙа төшөнкөлөккә бирешмәй, яҙғы баҫыу эштәренә әҙерләнәбеҙ, техникалар ремонтланған, техник тикшеренеү үтәсәк", - ти фермер Азамат Мәхмүтов.