Пенсионерҙар бер көнлөк турға сыҡты

“Демография” милли проекты (национальный проект “Демография”) оло йәштәгеләргә лә иғтибар күрһәтеүгә йүнәлтелгән. Ошо йәһәттән Нуриман районының оло йәштәге граждандары өсөн, “Башҡортостан оҙон ғүмерлелеге” проектына ярашлы, Өфө ҡалаһына бер көнлөк тур ойошторолдо. 

Экскурсия Өфө ҡалаһының Милли музейынан башланды. Тәжрибәле гид тыуған яҡтың тарихы буйынса ҡыҙыҡлы дәлилдәр килтерҙе, музей залы буйлап мауыҡтырғыс сәфәр ойошторҙо, хайуандар һәм үҫемлектәр донъяһы, тәбиғәт һәйкәлдәре, археологик һәм палеонтологик табыштар, шулай уҡ республикала йәшәгән халыҡтарҙың матди һәм рухи мәҙәниәте менән таныштырҙы. Шулай ҙа туристарҙың иң ҙур иғтибарын Рәсәй Геройы, генерал-майор М.М. Шайморатовҡа арналған зал йәлеп итте.

Артабан төркөм сәйәхәткә экскурсия автобусында йүнәлде. Туристар республиканың баш ҡалаһы тураһында күп ҡыҙыҡлы нимә белде - Салауат Юлаев һәйкәле янында булдылар, маршрут һуңында “Аҡбуҙат” ипподромына килделәр. Йылҡысылыҡ һәм ат спорты музейы буйлап йөрөгәндән һуң, төркөмдөң бер өлөшө тоҡомло сабыш аттары йәшәгән ат һарайын ҡараны. Экскурсия Ағиҙел йылғаһы буйлап теплоходта йөҙөү менән тамамланды. Туристар ҡәнәғәт булып өйҙәренә юлланды.

Экскурсия һәм юл хаҡы бушлай булды. ”Урал Тау” ресторанындағы төшкө аш өсөн 300-400 һум аҡса алыу ғына кәрәк ине. Райондан туристарҙы медицина хеҙмәткәре һәм район хакимиәте белгесе оҙатып йөрөнө, Өфөлә төркөмдө “Терра Башҡортостан” милли туроператор компанияһы вәкиле Лидия Махийәнова ҡаршыланы. Ул экскурсия дауамында туристар менән бергә булды.

 - Проект үҙенең эшен дауам итә. Проектта ҡатнашырға теләүселәргә  Долголетие.соцтуризмрб.рф сайтында теркәлергә кәрәк. Аҙаҡ үҙеңдең шәхси кабинетың аша уңайлы турҙы һайлап, бронь һалыу мөһим, - тине район хакимиәте иҡтисад бүлегенең баш  белгесе Ольга Мостафина.

“Демография” милли проекты ил Президенты Владимир Путиндың май указдарына ярашлы тормошҡа ашырыла.

Фото: Bash.news

#ВладимирПутин #национальныепроекты#нацпроектың

#региональныепроекты#регпроекты#нацпроектыБашкортостан