“Клуб – ул ауылдың йөрәге, йәне”

Рәсәй Президенты Владимир Путиндың май указы нигеҙендә барлыҡҡа килгән "Мәҙәниәт" милли проекты (национальный проект "Культура") сиктәрендә Ҡариҙел районы Яугилде ауылында күп функциялы ауыл клубы эш башланы.

Яңы мәҙәниәт усағы асыу тантанаһында Башҡортостандың мәҙәниәт министры Әминә Шафиҡова, Ҡариҙел районы хакимиәте башлығы Айҙар Шәйҙуллин, Яугилде ауыл советы башлығы Илшат Сөләймәнов ҡатнашты.

150 урынға тәғәйенләнгән күп функциялы клуб мәғлүмәт-танып белеү һәм күңел асыу өсөн уңайлы, матур урын буласаҡ. Унда Яугилде һәм эргә-тирәләге ауылдарҙан халыҡ ял итәсәк.

Клубтың төп маҡсаты – һәүәҫкәр ижад үҫешенә ярҙам итеү, халыҡ мәҙәниәтен үҫтереү. Бында төрлө йәштәге, ҡыҙыҡһыныуы төрлө булған кешеләр тормоштан йәм табып, күңел асасаҡ.

Яңы клубта хореография түңәрәге, аэробика секцияһы, артистар өсөн өс бүлмә, электроаппаратура, кастюм һаҡлау урыны, күргәҙмәләр өсөн зал бар. Тамаша залы 3D фильмы ҡарау өсөн тәғәйенләнгән. Унда ижади кисәләр үткәрергә, профессиональ һәм һәүәҫкәр коллективтарҙың сығышын ҡарарға мөмкин. Китапхана белешмә-мәғлүмәт үҙәге итеп ҡулланыла. Унда интернетҡа бушлай инергә була. Клуб бинаһы заманса ҡорамалдар менән: яҡтылыҡ-тауыш аппаратураһы, фильмдар күрһәтеү өсөн проектор менән йыһазландырылған.  

“Клуб – ауылдың йәне һәм йөрәге, - тине мәҙәниәт минитры Әминә Шафиҡова, - Бында таланттар асыла, милли, рухи байлыҡтар тергеҙелә, һаҡлана. Яугилде клубы ауыл кешеләренә яңы офоҡтар асып, күп милләтле республика халҡының үҙенсәлекле мәҙәниәтен һаҡларға, киләсәк быуынға тапшырырға ярҙам итәсәк. Ауылдың йәше, ҡарты бында йәне теләгән шөғөлдө табыр, рәхәтләнеп күңел асыр тип ышанам”.

 ВладимирПутин#национальныепроекты#нацпроекты
#региональныепроекты#регпроекты#нацпроектыБашкортостан

Фото: республиканың Мәҙәниәт министрлығы.