"Бындай автомобилде күптән көтә инек"

“Һаулыҡ һаҡлау” милли проектына ярашлы, Ҡариҙел үҙәк район дауаханаһына коляскалағы инвалидтарҙы йөрөтөү өсөн яңы "Лада Ларгус" автомобиле алынды.

Дауахананың баш табибы урынбаҫары Айрат Ғәлимйәнов әйтеүенсә, бындай автомобиль район дауаханаһы өсөн бик кәрәк. Транспорт сараһы инвалидтарға заманса медицина ярҙамынан тулыраҡ файҙаланырға ярҙам итә. Автомобилдең өҫтөнлөктәре күп: биш урынлыҡ, коляска өсөн майҙан етерлек, бер юлы ике инвалидты урынлаштырырға мөмкин, салонға инеү урыны уңайлы.

Табип-терапевт Анастасия Дубровина ауырыуҙар өсөн уңайлы автомобиль өсөн рәхмәт әйтеп бөтөрә алмай. ”Инвалидтар райондың төрлө мөйөштәрендә йәшәй, алыҫ тораҡтарҙа ла бар. Автомобиль пациенттарға оператив һәм сифатлы ярҙам күрһәтеүгә булышлыҡ итә”, – тип шатлана табип.

 Рәсәй Президенты Владимир Путиндың “май” указдарына ярашлы, һаулыҡ һаҡлау тармағы алдында торған ошо бурыстарҙы тормошҡа ашырырға кәрәк: хеҙмәткә һәләтле йәштәге халыҡтың үлем күрһәткестәрен кәметеү, шулай уҡ яман шештәрҙән үлем күрһәткестәрен (100 мең кешегә 185 сир осрағына тиклем) аҙайтыу, сабыйҙар үлемен ҡыҫҡартыу (бер мең яңы тыуған сабыйға 4,5 промилгә тиклем) һәм һәр кемдең тәүге медицина ярҙамынан файҙаланыу мөмкинлеген арттырыу.

Инновациялы медицина технологияларын, шул иҫәптән, пациенттың сәләмәтлегенә иртә диагностика һәм дистанцион мониторинг системаһын индереү, тармаҡта берҙәм дәүләт мәғлүмәт системаһы нигеҙендә медицина ойошмаларының үҙ-ара берҙәм эшмәкәрлеге механизмдарын булдырыу – көн ҡаҙағындағы бурыстарҙың береһе.

 ВладимирПутин#национальныепроекты#нацпроекты
#региональныепроекты#регпроекты#нацпроектыБашкортостан

Фото: Ҡариҙел үҙәк район дауаханаһы.