Социаль эшҡыуарлыҡтың маҡсаты ниҙә?

10 ноябрҙә Өфөлә ВДНХ ЭКСПО майҙансығында социаль эшҡыуарлыҡ буйынса төбәк-ара форум уҙғарыла. Бизнес һәм власть вәкилдәре, коммерцияға ҡарамаған ойошмалар, әйҙәүсе спикерҙар, федераль кимәлдәге эксперттар тармаҡтың проблемаларын һәм перспективаларын тикшерәсәк, эш тәжрибәләре менән уртаҡлашасаҡ. Сара “Бәләкәй һәм урта эшҡыуарлыҡ һәм шәхси эшҡыуарлыҡ инициативаһына ярҙам итеү” милли проектын тормошҡа ашырыу сиктәрендә уҙғарыла.

• Бөгөнгө көндә Башҡортостандың социаль эшҡыуарҙары реестрына 393 бәләкәй һәм урта эшҡыуарлыҡ субъекттары инә. Был 2021 йыл менән сағыштырғанда 77 предприятиеға күберәк. Социаль эшҡыуарҙар эшмәкәрлеге бик мөһим. Улар тауар етештереп, хеҙмәттәр күрһәтеп, иҡтисад тармағын ғына үҫтереп ҡалмай, халыҡтың социаль яҡтан нескә ҡатламына ла ярҙам күрһәтә, – тине Башҡортостандың эшҡыуарлыҡ һәм туризм министры Рөстәм Афзалов.

 Форум “Яңы ысынбарлыҡта социаль эшҡыуарлыҡ: бурыстар һәм перспективалар” темаһына арналған пленар ултырыш менән асыласаҡ. Унда төбәктең профиль министрлыҡтары һәм ведомстволары етәкселәре ҡатнаша. Шулай уҡ программала семинар уҙғарыу ҙа ҡаралған.

  Фото: Башҡортостан Хөкүмәте сайты.