Өлкәндәргә эш табырға ярҙам иттеләр

Башҡортостандың Ғаилә, хеҙмәт һәм халыҡты социаль яҡлау министрлығынан хәбәр итеүҙәренсә, ошо көндәрҙә республикалағы халыҡ мәшғүллеге үҙәктәрендә Өлкәндәрҙең эш һәм социаль әүҙемлегенә берҙәм булышлыҡ итеү көнө сиктәрендә саралар уҙғарылды. Акцияла эш эҙләгән пенсия алды һәм пенсия йәшендәге 500-ҙән ашыу кеше ҡатнашты.

Белгестәр эш табырға йәки эшмәкәрлек өлкәһен алмаштырырға теләгәндәргә мәшғүллектең хоҡуҡи мәсьәләләре, хеҙмәт ҡануниәте, финанс ғилеме буйынса кәңәш бирҙе, хеҙмәт баҙарында кәрәкле вакансиялар, белемде камиллаштырыу мөмкинлектәре, социаль ярҙам саралары тураһында һөйләне. Акцияға килгәндәр өсөн вакансиялар йәрминкәһе, резюме төҙөү һәм эш эҙләү буйынса оҫталыҡ дәрестәре, мәшғүллек үҙәктәренең “ҡыҙыу элемтә” телефондары буйынса консультация ойошторолдо.

Бөтә мәшғүллек үҙәктәрендә Рәсәй Президенты Владимир Путиндың май указы менән раҫланған “Демография” милли проектының (национальный проект “Демография”) “Мәшғүллеккә булышлыҡ итеү” федераль проектына ярашлы профессиональ һәм өҫтәмә һөнәри белем алыу мөмкинлеге тураһында мәғлүмәт бирҙеләр, шулай уҡ “Минең резюме”, “Минең әңгәмәм” сервистары менән таныштырҙылар.

Киләһе ошондай сараны 23 декабрҙә үткәреү планлаштырыла.

#ВладимирПутин
#национальныепроекты#нацпроекты
#региональныепроекты#регпроекты#нацпроектыБашкортостан

Фото: contenta.info/press_releases/361688#scroll

Сығанаҡ: https://contenta.info/press_releases/361688#scroll