Экологик конкурс еңеүселәре бүләкләнде

Башҡортостандың Тәбиғәттән файҙаланыу һәм экология министрлығынан хәбәр итеүҙәренсә, ошо көндәрҙә министрлыҡтың Мәсәғүт территориаль комитеты тарафынан Рәсәй Президенты Владимир Путиндың май указы менән раҫланған “Экология” милли проектына (национальный проект “Экология”) ярашлы уҙғарылған “Планетаны сүп-сарҙан һаҡла” экологик конкурсы тамамланды.

18 ноябрҙән 12 декабргә тиклем үткәрелгән бәйгелә Дыуан, Мәсетле, Салауат, Ҡыйғы һәм Балаҡатай райондары мәктәптәренән 1 – 7-се класс уҡыусылары ҡатнашты. Конкурс комиссияһы 200-ҙән ашыу эште ҡараны. Иң-иңдәрҙе билдәләү өсөн Дыуан районының Балалар музыка мәктәбенән уҡытыусы-рәссамдар йәлеп ителде.  

– Еңеүселәрҙе билдәләү еңелдән булманы. Һүрәттәрҙә донъяға балалар күҙлегенән баҡтыҡ. Һәр эш – үҙенсәлекле, еңеүгә лайыҡ, – тине Тәбиғәттән файҙаланыу һәм экология министрлығының Мәсәғүт территориаль комитеты рәйесе Юрис Ишмөхәмәтов.

Бәйге йомғаҡтары буйынса беренсе урынға Дыуан районынан Светлана Малофеева, Мәсетле районынан Эвелина Ғәйнетдинова, Гөлназ Сабиғийәрова, Салауат районынан Аслан Ниғәмәтов, Амелия Ямалова, Дарина Хисмәтуллина лайыҡ булды. Еңеүселәргә һәм бәйгелә әүҙем ҡатнашҡандарға Экология министрлығының рәхмәт хаттары, почет грамоталары, иҫтәлекле бүләктәр тапшырылды.

#ВладимирПутин
#национальныепроекты#нацпроекты
#региональныепроекты#регпроекты#нацпроектыБашкортостан

Фото: ecology.bashkortostan.ru

Сығанаҡ: https://contenta.info/press_releases/367474#scroll