Йәшелсә үҫтереү буйынса оҫталар

Халыҡ-ара бизнес аҙналығында "Бәләкәй һәм урта эшҡыуарлыҡ башланғыстарына булышлыҡ итеү" милли проектын тормошҡа ашырыуға ярашлы "Йыл эшҡыуары-2022" конкурсы үтте.

Сарала бүләкләнеүселәр араһында Стәрлетамаҡ районы эшҡыуары Павел Белов та бар. Беловтар «Йылдың иң яҡшы ғаилә бизнесы» номинацияһында алдынғы тип таныла. 2009 йылда Яңы Ҡыҙылъяр ауылында йәшәгән Беловтар йәшелсә үҫтереү буйынса ғаилә фермаһы ойоштора. Ошо йылдар дауамында бизнес уңышлы үҫешә. Башта ҡуртымға алынған ҙур булмаған ер участкаһында эш башлаһалар, хәҙер 100 гектар майҙанда йәшелсә үҫтерәләр. Етешерелгән культуралар ассортименты ла киңәйгән. Кәбеҫтә, картуф, кишерҙән тыш, ҡыяр, помидор, төрлө тәмләткес үләндәрҙе һатыуға тәҡдим итәләр.

Юғары сифатлы уңыш алыуға өлгәшеү өсөн фермерҙарға ерҙе яратыу ғына түгел, ә аграр университетта алған белемдәре лә ярҙам итә. Улар 1988 йылда Башҡорт ауыл хужалығы институтын тамамлай. Павел Степанович — механизация факультетын тамамлаһа, Светлана Александровна — иҡтисадсы. Һуңғы йылдарҙа ғаилә бизнесына улдары Андрей ҡушыла, ул шулай уҡ 2014 йылда ошо уҡыу йортон тамамлап, инженер-механик һөнәрен ала.

Стәрлетамаҡ районы хакимиәтенән хәбәр итеүҙәренсә, Рәсәй Президенты Владимир Путиндың май указы менән раҫланған “Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү” милли проектына (национальный проект “Малый бизнес и поддержка индивидуальной предпринимательской инициативы”) ярашлы фермерҙар грант алған. Район халҡының өҫтәлендә экологик яҡтан таҙа йәшелсә булһын өсөн ал-ял белмәй эшләгән ғаиләгә уңыштар теләргә генә ҡала.

#ВладимирПутин#национальныепроекты#нацпроекты
#региональныепроекты#регпроекты#нацпроектыБашкортостан  

Фотолар Стәрлетамаҡ районы хакмиәтенән алынды.