Башҡортостанда эшҡыуарҙар яҡлаулы

“Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү” милли проекты (национальный проект "Малое и среднее предпринимательство и поддержка индивидуальной предпринимательской инициативы") буйынса йәш һәм социаль эшҡыуарҙарға ярҙам итеү буйынса Рәсәй төбәктәре араһында Башҡортостан беренсе урын алған.

Уҙған йылда был тармаҡ үҫешенә ярҙамдан 300-гә яҡын бәләкәй һәм урта эшҡыуарлыҡ субъекты файҙаланған, тип хәбәр итәләр Эшҡыуарлыҡ һәм туризм министрлығынан.

"Социаль эшҡыуарлыҡ – йәшәү сифатына ыңғай йоғонто яһаған, йәмғиәтебеҙ өсөн мөһим проблемаларҙы хәл итеүгә булышлыҡ иткән йүнәлеш. Беҙ уға ярҙам итеүгә ҙур иғтибар бирәбеҙ. 2022 йылда Башҡортостанда йәш эшҡыуарҙарға һәм халыҡ художество кәсептәре өлкәһендә эшләгәндәргә грант рәүешендә финанс ярҙам күрһәтелде", - ти эшҡыуарлыҡ һәм туризм министры Рөстәм Афзалов.

Грантты күберәк мәғариф, һаулыҡ һаҡлау, социаль хеҙмәттәр, сауҙа, мәҙәниәт, спорт, ял һәм күңел асыу өлкәләрендә эшләгәндәр алған. Йәш йүнселдәргә шулай уҡ эшкәртеү производствоһында, ресторан асыуҙа, ташыу хеҙмәттәрен башҡарыуҙа йыш ярҙам күрһәтелгән.

“Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү” милли проектының маҡсаты – бизнесҡа төрлө үҫеш этабында ярҙам итеү: старт идеяһынан башлап киңәйеп экспортҡа сыҡҡанға тиклем. 2019 йылда Рәсәй Президенты Владимир Путин башланғысы менән булдырылған милли проекттар уңышлы ғәмәлгә ашырыла.

Фото: bash.news

#ВладимирПутин #национальныепроекты#нацпроекты

#региональныепроекты#регпроекты#нацпроектыБашкортостан