Дауаханалар ҡиммәтле наркоз-тын алыу аппараттары алды

«Һаулыҡ һаҡлау» милли проектының беренсел звеноһын яңыртыу буйынса программаны тормошҡа ашырыу һөҙөмтәһендә Башҡортостан дауаханаларына яңы наркоз-тын алыу аппараттары килтерелгән.

Был хаҡта республика Һаулыҡ һаҡлау министрлығының матбуғат хеҙмәтендә хәбәр итәләр. Республика дауаханалары дөйөм хаҡы 67 миллион һумдан ашыулыҡ 16 наркоз-тын алыу аппараты алған. Техника анестезия үткәреү, үпкәне елләтеү һәм пациенттың йәшәү эшмәкәрлеге параметрҙарын мониторинглау өсөн тәғәйенләнгән. Шундай аппараттарҙың береһен Талбазы үҙәк район дауаханаһы алған. 4,2 миллион һумлыҡ ҡорамал төрлө йәштәге пациенттар өсөн тәғәйенләнгән. Был кислород, азот һәм шыйыҡ анестетик парҙары ярҙамында ингаляция анестезияһын ебәргәндә ҡулланылған заманса, компактлы ҡоролма, тип аңлаталар белгестәр.

Шул уҡ дауаханаға 1 миллион һумдан ашыу торған үпкәләрҙе яһалма елләтеү аппараты ла килтерелгән. Яңы ҡорамал өлкәндәрҙе, шулай уҡ реанимация һәм интенсив терапия бүлексәләрендә 5 килограмдан алып ауырлыҡтағы балаларҙы дауалау өсөн тәғәйенләнгән. “Аппараттың елләтеү режимдары һәм параметрҙары киң.  Был теләһә ниндәй клиник хәлдә лә үпкәне сифатлы елләтергә мөмкинлек бирә, тигән һүҙ. Яңы техника пациенттың тын алыу һәм респиратор механикаһының бөтә төп параметрҙарына мониторинг алып бара”, тип билдәләй Талбазы үҙәк район дауаханаһының баш табибы Роберт Иштуков.

Бығаса киң мәғлүмәт саралары хәбәр иткәнсә, Дүртөйлө үҙәк район дауаханаһы «Һаулыҡ һаҡлау» милли проектын тормошҡа ашырыу һөҙөмтәһендә өс автомобиль алғайны. Мәғлүм булыуынса, «Һаулыҡ һаҡлау» милли проекты (нацпроект “Здравохранение”) Рәсәй Президенты Владимир Путиндың башланғысы буйынса тормошҡа ашырыла.

#ВладимирПутин#национальныепроекты#нацпроекты
#региональныепроекты#регпроекты#нацпроектыБашкортостан

Фото: health.bashkortostan.ru