Газға күскән транспорт һаны арта

Башҡортостандың Транспорт һәм юл хужалығы министрлығынан хәбәр итеүҙәренсә, республикала транспорт сараларын экологик яғыулыҡҡа күсереү барышында пассажирҙар ташыу менән шөғөлләнгән компанияларҙың автопаркы газ-мотор яғыулығы менән эшләгән автобустар менән тулылана.

Мәҫәлән, Рәсәй Президенты Владимир Путиндың указы менән раҫланған “Хәүефһеҙ һәм сифатлы автомобиль юлдары” милли проектының (национальный проект “Безопасные и качественные автомобильные дороги”) “Йәмәғәт транспортын үҫтереү” федераль проектына ярашлы – 35 автобус, инфраструктураны бюджеттан кредитлау буйынса метан яҡҡан 70 транспорт сараһы һатып алынған.

Яңы автобустар “Уңайлы мөхит” программаһына ярашлы йыһазландырылған. Улар тәбиғи газ яғыу иҫәбенә юғары экологиялылығы менән айырылып тора. 2023 йылдың мартына республикала 533 автобус газ-мотор яғыулығы менән эшләй, уларҙың 401-е – “Башавтотранс” дәүләт унитар предприятиеһыныҡы һәм 132-һе – шәхси ойошмаларҙыҡы. 

Былтыр “Башҡортостан Республикаһының транспорт системаһын үҫтереү” төбәк программаһы нигеҙендә 1136 транспорт сараһы газ-мотор яғыулығына күсерелгән.

Фото: contenta.info

Сығанаҡ: Контента | Инфоповод (contenta.info)