"Экспорт форсажы" - яңы эш башлағандарға ярҙам

Башҡортостанда “Халыҡ-ара кооперация һәм экспорт” милли проекты буйынса акселерация программаһы эшләй башланы. Унда республиканың 11 предприятиеһы ҡатнаша, тип хәбәр итә Тышҡы иҡтисади бәйләнештәр һәм конгресс эшмәкәрлеге министрлығы.

– “Экспорт форсажы” программаһының һигеҙенсе күп тармаҡлы ағымына старт бирәбеҙ. Республикабыҙҙың яңы эш башлаған экспортерҙарына ярҙам итеүҙең был ысулы үҙ һөҙөмтәлелеген иҫбатланы ла инде. Был программа буйынса уҡытыу һөҙөмтәһендә ҡатнашыусыларҙың 50 проценттан ашыуы экспорт географияһын киңәйтеп, яңы контракттарға ҡул ҡуйҙы, — ти тышҡы иҡтисади бәйләнештәр һәм конгресс эшмәкәрлеге министры Маргарита Болычева.

Уҡытыу “Рәсәй Экспорт үҙәге”нең Экспорт мәктәбе базаһында алып барыла. Программа бәләкәй һәм урта эшҡыуарлыҡтың экспорт ҡеүәтен арттырыуға йүнәлтелгән. Ҡатнашыусылар экспорт эшмәкәрлеге менән таныштырыу, баҙар һайлап алыу һәм һатып алыусыны эҙләү, экспорт маркетингы, финанс шарттарын формалаштырыу, экспорт транзакцияһын тормошҡа ашырыу, һөйләшеүҙәр алып барыу, контракт төҙөү кеүек темаларға анализ яһаясаҡ.

Республикала кәмендә өс йыл эшләгән бәләкәй һәм урта эшҡыуарлыҡ вәкилдәре ҡатнаша ала, уларҙың һуңғы финанс йылына тауар әйләнеше 20 миллиондан ике миллиард һумға тиклем тәшкил итергә тейеш. Быға тиклем Башҡортостанда Экспортҡа ярҙам үҙәге хеҙмәтен алған компаниялар ҙа ғариза бирә ала.

“Халыҡ-ара кооперация һәм экспорт” милли проекты (национальный проект ”Международная кооперация и экспорт”) яңы иҡтисади бәйләнештәр булдырыуға һәм Рәсәй етештерелгән тауарҙар экспортын үҫтереүгә йүнәлтелгән. Рәсәй Президенты Владимир Путиндың тәҡдиме буйынса, милли проекттар 2019 йылда ғәмәлгә ашырыла башланды.

Фото: foreign.bashkortostan.ru