Шарттар хәҙер – яҡшы!

“Алдағы йылда үҙенең туҡһан йыллығын билдәләйәсәк колледж – республиканың тәжрибәле уҡыу йорттарының береһе.

2022 йылда ул беренселәрҙән булып урта һөнәри белем биреүҙе модернизациялау программаһына инде. Ошо программа ярҙамында республикала 11 колледж ремонтланды, быйыл был эштәрҙе дауам итәбеҙ.

Асҡын колледжында йәмғеһе 248 студент белем ала. Уларҙың көнкүреше һәм уҡыуы өсөн хәҙер бында шарттар яҡшы: уҡыу биналарын, ашхананы, 68 урынлыҡ ятаҡты яңырттыҡ. Алда колледж биләмәһен төҙөкләндереү, аҙыҡ блогына ҡорамал һәм яңы йыһаз алыу бурысы тора.

Республика абитуриенттары урта һөнәри белем алыу менән ҡыҙыҡһына һәм беҙҙең бурыс – йәш һөнәр эйәләрен Башҡортостандан ситкә ебәрмәү!” – тип яҙып сыҡты Радий Фәрит улы.

Әйткәндәй, колледжда быйыл тамамланасаҡ капиталь ремонт “Мәғариф” милли проекты сиктәрендә башҡарыла. Ремонт өсөн 60 миллион һум аҡса бүленгән, Радий Хәбиров атап киткән эштәрҙе тамамлар өсөн республика ҡаҙнаһынан тағы 20 миллион һум бүлергә ҡушты.

Уҡыу йорто директоры Ринат Саҙрыев билдәләүенсә, туҡһан йылға яҡын тарихта бында 45 мең ауыл хужалығы белгесе әҙерләнгән, шул иҫәптән тракторсылар, водителдәр, иретеп йәбештереүселәр, электромонтерҙар, ашнаҡсылар. Әммә колледж бөгөнгө көндә яңы йүнәлештәр буйынса ла эшләй: улар араһында тегенселәр, слесарҙәр, столярҙар һәм бухгалтерҙар.

Колледждың автопаркы һәм сәсеү ерлектәре лә бар.

Фотолар республика Башлығы рәсми сайтынан алынды.