Һәләтле уҡыусылар БР Башлығы стипендияһына дәғүә итә ала

Башҡортостан Республикаһы Мәғариф һәм фән министрлығы 2023-2024 уҡыу йылында айырыуса һәләтле уҡыусыларға Башҡортостан Республикаһы Башлығы стипендияларын тәғәйенләү тураһында хәбәр итә.

Стипендияларҙы, Башҡортостан Республикаһы Президентының 1999 йылдың 28 октябрендәге "Айырыуса һәләтле уҡыусылар өсөн Башҡортостан Республикаһы Башлығы стипендиялары тураһында"ғы 700-сө Указына ярашлы, Башҡортостан Республикаһының Мәғариф һәм фән министрлығы билдәләй.

Стипендия алыуға кәрәкле документтар исемлеге менән БР Мәғариф һәм фән министрлығы сайтында танышырға мөмкин.

Республиканың муниципаль райондары һәм ҡала округтарында мәғариф өлкәһендә идара итеү эшмәкәрлеген алып барған урындағы үҙидара органдары һәр дәғүәсегә ҡағыҙ вариантта эшләнгән документтар комплектын Башҡортостан Республикаһы Мәғариф һәм фән министрлығының дөйөм белем биреү өлкәһендәге дәүләт сәйәсәте бүлегенә тапшыра. Адресы: Өфө ҡалаһы, Театр урамы, 5/2, 305-се бүлмә. Документтар 2023 йылдың 13 сентябренә тиклем ҡабул ителә. Алдан 7 (347) 218-03-26 телефоны буйынса яҙылырға кәрәк.

Бындай башланғыстар “Мәғариф” милли проектында (национальный проект “Образование”) билдәләнгән мөһим бурыстарҙы тормошҡа ашырыуға булышлыҡ итә. Белеүебеҙсә, әлеге милли проект ил Президенты Владимир Путиндың май указдары менән раҫланды.

Фото: resbash.ru