Милли проекттар ярҙамында ҡала төҙөкләнә

Ошо көндәрҙә Нефтекама ҡалаһы хакимиәте башлығы Эльдар Вәлидов үткән йылға йомғаҡ яһаны һәм быйылға ҡуйылған пландар тураһында һөйләне.

• Былтыр атҡарылған иң ҙур проекттарҙың береһе – таҙартыу ҡоролмаларын төҙөкләндереү һәм канализация һурҙырыу станцияһын төҙөү булды. Был ике проект киләһе 50 йыл дауамында ҡала халҡының йәшәү сифатын яҡшыртасаҡ. Бынан тыш, Нефтекама ҡалаһы “Мәғариф системаһында мәктәптәрҙе төҙөкләндереү” төбәк программаһы буйынса алдынғылар иҫәбендә килә. “Мәғарифты үҫтереү” дәүләт программаһына ярашлы ун мәктәптә төҙөкләндереү эштәре атҡарылды. Быйыл иһә бындай эштәр ике мәктәптә үтәсәк. Ҡаланың яңы биҫтәһендә 1225 урынлыҡ мәктәпте төҙөү эштәре дауам итә. “Торпедо” стадионында футбол майҙансығына япма эшләнде, уның дөйөм майҙаны алты мең метр квадрат, ә йүгереү өсөн юлдарҙың оҙонлоғо 400 метр тәшкил итә, - тип һөйләй Эльдар Вәлидов.

Ҡалала «Демография» милли проектының «Спорт — тормош нигеҙе» төбәк проекты сиктәрендә төп спорт төрҙәре буйынса күнекмәләр үткәреүсе ойошмалар спорт ҡорамалдары һәм инвентарь менән йыһазландырылған. Милли проекттар сиктәрендә Республика Башлығы Радий Хәбиров һәм Рәсәй Федерацияһы Президенты Владимир Путин ярҙамы менән, Йәштәр йортонда матди-техник ҡорамалдар яңыртыла, капиталь ремонт үткәрелә. Йәштәр эштәре буйынса федераль агентлыҡ (Росмолодеж) һәм Башҡортостан Республикаһының Йәштәр эштәре буйынса дәүләт комитеты ярҙамында «Йәштәр өсөн төбәк» проекты сиктәрендә, өҫтәүенә милли проект ярҙамында "Балалар һынлы сәнғәт мәктәбен" төҙөкләндереү мөмкинлеге килеп тыуа. «Уңайлы ҡала мөхитен булдырыу» төбәк проекты сиктәрендә «Мирас» картиналар галереяһы алдындағы майҙан танымаҫлыҡ итеп үҙгәртелә.

2024 йылда Юбилей проспекты буйлап йәйәүлеләр аллеяһының дауамын яҡшыртыу планлаштырыла.

“15 марттан яңы биләмәләрҙе төҙөкләндереү өсөн тауыш биреү этабы башлана. Ике йыл элек ҡала хакимиәтен етәкләй башлағанда уҡ ҡаланан ситтә ятҡан биләмәләрҙе төҙөкләндереүгә иғтибарҙы йүнәлтәсәкбеҙ тип белдергәйнем. Был һүҙҙән тайпылмайбыҙ. Быйыл Әмзә, Энергетик, Ташкинов ауылдарындағы майҙандарҙы тауыш биреүгә сығарасаҡбыҙ”, - тип һөйләне Эльдар Вәлидов.

Ҡала хакимиәте һөйләгән эштәрҙең күбеһе Рәсәй Президенты Владимир Путиндың “май” указдарына ярашлы барлыҡҡа килгән “Торлаҡ һәм ҡала мөхите” милли проекты (национальный проект “Жилье и городская среда”) сиктәрендә тормошҡа ашырыла.

Фото: “Красное знамя” гәзите сайтынан алынды.