Ете ҡала еңеүгә дәғүә итә

Ете муниципалитеттың хакимиәттәре Ҡалалар үҫеше институты ярҙамы менән бәләкәй ҡалаларҙа һәм тарихи биләмәләрҙә уңайлы мөхит булдырыуҙың иң яҡшы проекттарының 9-сы Бөтә Рәсәй конкурсында ҡатнашыуға ғариза бирҙе, тип хәбәр итә Башҡортостандың торлаҡ-коммуналь хужалығы министры Ирина Голованова.

Бөтә Рәсәй конкурсы “Торлаҡ һәм ҡала мөхите” милли проекты сиктәрендә (национальный проект “Жилье и городская среда”) үткәрелә. Милли проекттар ил Президенты Владимир Путин ҡарары менән тормошҡа ашырыла.

Был проектта түбәндәгеләр ҡатнаша: “Новаторҙар бульвары” (Бәләбәй), “Иванов баҡсаһы. Киләсәк үҫентеләре” (Дүртөйлө), "Нефтекама: ваҡыт күсәре”, “Октябрьский: мираҫты һаҡлап”, “Салауат: ысынбарлыҡ аша ете төш”, “Урал батыр юлы" (Учалы), “Воскресенск рәттәре" (Благовещен).

Федераль эксперттар тәҡдим ителгән йәмәғәт киңлектәренең проекттарын  өйрәнәсәк  һәм уларға баһа бирәсәк. Конкурс һөҙөмтәләре 1 сентябргә тиклем билдәле буласаҡ. Иң яҡшы проекттар Рәсәйҙең Төҙөлөш министрлығының гранттарын аласаҡ. 2019 йылдан 2024 йылға тиклем Башҡортостан конкурсҡа 66 ғариза тапшырған, улар араһында 29 проект грант яулаған.

Фото: “Башинформ”.