Спорт объекттарына табан юлдар яҡшыра

Башҡортостанда “Хәүефһеҙ һәм сифатлы юлдар” милли проектына ярашлы, (национальный проект “Безопасные качественные дороги”)  спорт ҡоролмаларына ҡарай өс юл ремонтланды.

Өфөлә Рихард Зорге урамында СССР-ҙың 50 йыллығы урамынан Шәфиев урамына тиклемге участка, шулай уҡ Стәрлетамаҡта Комаров урамы һәм Урау юл яңы төҫ алды. Был урамдарҙа юлсылар гранит бордюрҙар ҡуйҙы, асфальт-бетон япманы яңыртты, термопоастиктан тамғалар эшләне.

 - Рихард Зорге урамы Спорт һарайына юлды тәьмин итә. Стәрлетамаҡтағы Комаров һәм Урау юл “Стәрлетамаҡ-Арена” спорт комплексына илтә. Ике спорт объектына ла йәш хоккейсылар йөрөй. Бында көн һайын күнекмәләр, ярыштар үтә. Шуға ла был юлдарҙы яҡшыртыу кәрәк ине, - тине Башҡортостандың транспорт һәм юл хужалығы министры вазифаһын башҡарыусы Любовь Минакова.

Милли проекттар Рәсәй Президенты Владимир Путиндың ҡарары менән 2019 йылдан тормошҡа ашырыла.

Фото: Башҡортостан Хөкүмәте сайты.