Дүртөйлө районында Әсә көнөн билдәләнеләр

Әсә көнө айҡанлы Дүртөйлө районы Әсән ауылы моделле китапханаһында “Мәҙәниәт” милли проекты сиктәрендә “көмөш быуын” вәкилен саҡырып байрам сараһы ойошторолдо.

Осрашыуҙа ҡатнашыусыларҙы сағыу һәм төрлө-төрлө программа: хәрәкәтсән уйындар, моңло музыкаль паузалар, күңелле бейеү номерҙары, шаян конкурстар, төрлө йылдарҙағы мәҡәлдәр һәм йырҙар тураһында мауыҡтырғыс викториналар көтә ине. Наҙлы һүҙҙәр, ысын йылмайыу, яҡты хәтирәләр - былар барыһы ла ысын мәғәнәһендә тылсымлы мөхит тыуҙырҙы. Сағыу презентация байрам кисәһенә сағыу буяуҙар өҫтәне, сара матур сәй эсеү менән тамамланды.

“Китапханала Әсә көнөнә арналған бик шәп сара уҙҙы! Мин ҙур позитив заряд алдым. Байрам бик тулҡынландырғыс һәм изге булды!”, - тип тәьҫораттары менән уртаҡлашты сарала ҡатнашыусы Лилиә Фазлыева.

"Ошо байрамды ойоштороуҙа һәм уҙғарыуҙа ҡатнашҡандарҙың барыһына ла рәхмәт белдерәбеҙ! Әсән китапханаһы белем һаҡлағысы ғына түгел, ә бөтә быуын кешеләре өсөн ысын мәҙәни һәм аралашыу үҙәге булыуын йәнә иҫбатланы”, - тип билдәләнеләр Дүртөйлө районы хакимиәтендә.

Билдәле булыуынса, “Мәҙәниәт” (национальный проект “Культура”) милли проекты Рәсәй Президенты Владимир Путиндың май указы менән булдырылды.

Фото: Дүртөйлө районы хакимиәте.