44 үҙәк асылды

Башҡортостанда былтырғы йыл аҙағында 44 заманса кадрҙар үҙәге асылды, быйыл тағы ла ун бише эшләй башлаясаҡ, шул иҫәптән – ун модуль үҙәк.

Был эш Рәсәй Президенты Владимир Путиндың Май указдары тарафынан раҫланған “Демография“  милли проектына (национальный проект “Демография“) ярашлы башҡарылды. Хәтерегеҙгә төшөрәбеҙ: былтыр Башҡортостанда һәм Рәсәйҙең тағы ла 11 төбәгендә халыҡ мәшғүллеге үҙәктәрен яңыртыу буйынса комплекслы программа тормошҡа ашырыла башланы. Унан алдағы йылда ошондай уҡ сара 17 төбәктә башҡарылғайны.

“Беҙҙең республика – был проектта ҡатнашҡан иң ҙур төбәк. Республика мәшғүллек үҙәген дә иҫәпкә алғанда, беҙҙә халыҡты эш менән тәьмин итеүсе 69 ойошма бар. Уларҙағы хеҙмәткәрҙәр һаны мең кешенән аша”, – ти Башҡортостандың ғаилә, хеҙмәт һәм халыҡты социаль яҡлау министры Ленара Иванова.

Мәшғүллек үҙәктәрен яңыртыуға республика федераль ҡаҙнанан 426 миллион һум алды, бынан тыш төбәк бюджетынан 337 миллион һум бүленде.

“Башинформ” фотоһы.