Ҡатын-ҡыҙ һаулығы өсөн

Башҡортостанда «Ғаилә» яңы милли проекты (национальный проект “Семья”) сиктәрендә ауыл райондарында һигеҙ ҡатын-ҡыҙ консультацияһы кабинетын асыу планлаштырыла. Мәғлүм булыуынса, милли проекттар Рәсәй Президенты В. Путин башланғысы менән 2019 йылдан тормошҡа ашырыла.

Ҡатын-ҡыҙҙар консультациялары Языково, Борай, Иҫәнғол, Краснокама, Оло Ыҡтамаҡ, Миәкә, Нуриман һәм Үрге Тәтешле үҙәк район дауаханалары базаһында урынлашасаҡ. Был поликлиникалар составындағы медицина ойошмаларында акушер-гинеколог кабинеттары эшләй, әммә ҡатын-ҡыҙҙар өсөн махсус консультациялар булдырыу ҙа планлаштырыла. Һәр консультация заманса ҡорамалдар менән йыһазландырыласаҡ һәм үҙ эсенә ике акушер-гинеколог табип кабинетын, шулай уҡ ультратауыш диагностикаһы, медицина-социаль ярҙам һәм функциональ диагностика кабинеттарын аласаҡ.

Яңы ҡатын-ҡыҙҙар консультацияларын асыу ҡатын-ҡыҙҙарға медицина ярҙамының сифатын һәм уңайлылығын арттырыуға йүнәлтелгән, шулай уҡ тыуымдың артыуына булышлыҡ итергә тейеш.

Хәтерегеҙгә төшөрәбеҙ, «Ғаилә» милли проекты дәүләт етәксеһе Владимир Путин ҡушыуы буйынса 2025 йылдың 1 ғинуарынан башланды. Милли проект биш федераль проекттан тора: «Ғаиләгә ярҙам», «Күп балалы ғаилә», «Әсәлекте һәм балалыҡты һаҡлау», «Өлкән быуын», «Ғаилә ҡиммәттәре һәм мәҙәниәт инфраструктураһы».

«Ғаилә» милли проекты буйынса республикала өс перинаталь үҙәкте заманса медицина ҡорамалдары менән йыһазландырыу күҙаллана.

Фото: “Башинформ”