Иглинда Елена Иглина исемендәге парк төҙөкләндерелә

Иглин ауылында Елена Иглина исемендәге паркты реконструкциялау буйынса эштәр әүҙем алып барыла. Проект “Тормош өсөн инфраструктура” милли проектының (национальный проект “Инфраструктура для жизни”) “Уңайлы ҡала мөхитен булдырыу” программаһы сиктәрендә тормошҡа ашырыла, тип хәбәр иттеләр Иглин районы хакимиәтендә.

– Паркты төҙөкләндереү – халыҡ өсөн уңайлы урын булдырыуҙа мөһим аҙым. Беҙ уны заманса, уңайлы һәм матур итергә тырышабыҙ, — тип билдәләне Иглин ауыл советы башлығы Регина Байдәүләтова.

Паркта иҫке асфальт-бетон япма һәм борт таштары һүтелә, велосипед юлы, төп аллея һәм сәхнә өсөн майҙансыҡ ҡом-ҡырсынташ ҡатнашмаһы менән түшәлә, үҙәк участкаларға брусчатка һалына, яңы тротуар бордюрҙары ҡуйыла.

Параллель рәүештә Елена Иглина һәйкәлен ремонтлау һәм постаментты төҙөкләндереү бара. Өҫтәмә рәүештә урындағы бюджет аҡсаһы иҫәбенә яҡтыртыуҙы монтажлау башлана – был паркты киске ваҡытта хәүефһеҙерәк һәм уңайлыраҡ итә.

Фото: Иглин районы хакимиәте.