Нефтекамала ГТО нормаларын тапшырыу өсөн тәүге майҙансыҡ барлыҡҡа килде

Башҡортостандың Ташкин ауылында «Рәсәй спорты»(госпрограмма «Спорт России») дәүләт программаһы ярҙамында «Хеҙмәткә һәм оборонаға әҙер» бөтә Рәсәй физкультура-спорт комплексы нормативтарын үтәү өсөн яңы майҙансыҡ асылды. Ул Нефтекама ҡалаһы ҡала округында ошондай тәүге объект булды, тип хәбәр иттеләр урындағы хакимиәттә.

Майҙансыҡ турниктар һәм заманса урам тренажерҙары менән йыһазландырылған. Улар ГТО-ның төрлө һынауҙарын һәм саф һауала күнекмәләр үткәреү өсөн дә ҡулай. Дәрестәр уңайлыраҡ булһын өсөн территорияла шыума япма түшәлгән.

«Киләсәктә майҙансыҡта тәжрибәле тренерҙар һәм спортсылар ҡатнашлығында даими спорт саралары, ярыштар һәм оҫталыҡ дәрестәре үткәрергә ниәтләйбеҙ. Был тағы ла күберәк кешеләрҙе спорт менән шөғөлләнеүгә йәлеп итергә һәм майҙансыҡты Ташкин ауылындағы ысын сәләмәт йәшәү рәүеше үҙәге итергә мөмкинлек бирә», - тип билдәләне Нефтекама хакимиәте башлығы Эльдар Вәлидов.

«Рәсәй спорты» дәүләт программаһы физик әүҙемлек менән шөғөлләнеү өсөн шарттар булдырыуға һәм яҡшыртыуға, күмәк спортты популярлаштырыуға һәм рәсәйҙәрҙең йәшәү сифатын арттырыуға йүнәлтелгән. Илдә тейешле инфраструктура киңәйә, күләмле саралар уҙғарыла, «Хеҙмәткә һәм оборонаға әҙер» бөтә Рәсәй физкультура-спорт комплексы ғәмәлгә ашырыла, шулай уҡ балалар араһында күнекмәләр өсөн яңы мөмкинлектәр барлыҡҡа килә. Программа Рәсәй Президенты Владимир Путиндың ҡарары буйынса 2025 йылдан тормошҡа ашырыла.

Фото: “Красная Знамя” газетаһы