Стәрлетамаҡтың туристик коды булдырылған

Былтыр «Туризм һәм ҡунаҡсыллыҡ» милли проекты (национальный проект “Туризм и гостеприимство”) сараларына ярашлы, Стәрлетамаҡ ҡалаһы үҙәгенең туристик коды булдырылды. Был башланғыс ҡаланың тарихи үҙәген төҙөкләндерергә һәм заманса туристик инфраструктура булдырырға мөмкинлек бирҙе, тип хәбәр итә республиканың Эшҡыуарлыҡ һәм туризм министрлығы.

– Стәрлетамаҡ үҙәгенең туристик кодын булдырыу – туризмды үҫтереүҙә һәм тарихи мираҫты һаҡлауҙа мөһим аҙым. Тормошҡа ашырылған саралар ҡала халҡын һәм ҡунаҡтарҙы йәлеп итеү көсөн арттырып ҡына ҡалмай, ә әүҙем ял итеү һәм саралар үткәреү өсөн заманса шарттарҙы ла тәьмин итә, — тип билдәләй Башҡортостандың эшҡыуарлыҡ һәм туризм министры Светлана Верещагина.

«Стәрлетамаҡ – креатив ҡала» проектына 100,5 миллион һум аҡса йәлеп ителгән. Финанс ярҙамы күп сараларҙы тормошҡа ашырырға мөмкинлек биргән: заманса туристик-мәғлүмәт үҙәге булдырылған, маршрут стелалары, мәғлүмәт стендтары һәм алтаҡталар, директив күрһәткестәр һәм насар күреүселәр өсөн Брайль шрифты менән эшләнгән тактиль карталар, арт-объекттар ҡуйылған.

Яңыртылған милли проекттар, РФ Президенты В. В. Путин ҡарары буйынса, былтырҙан тормошҡа ашырыла.

Беҙҙең МАХ каналына ҡушылығыҙ: https://max.ru/gazetabashkortostan 

Фото: biznestur.bashkortostan.ru