Үрге Йәркәйҙә коммуналь селтәрҙәр яңыртыла

“Тормош өсөн инфраструктура” милли проектына ярашлы (национальный проект “Инфраструктура для жизни”) Үрге Йәркәйҙә һыу менән тәьмин итеү селтәрҙәре модернизациялана, тип хәбәр итә республиканың Торлаҡ-коммуналь хужалығы министрлығы.

Объект Яримов һәм Пушкин урамдарында урынлашҡан. Уның дөйөм оҙонлоғо 670 метр тәшкил итә. Эш барышында ҡорос торбалар заманса полиэтилен торбаларға алмаштырыла.

– Коммуналь селтәрҙәрҙе капиталь ремонтлау - ҡатмарлы технология процесы. Ул барлыҡ этапта ла һөнәри оҫталыҡты талап итә. Беҙ һуңғы һөҙөмтәгә генә түгел, эш барышына ла ҙур иғтибар бирәбеҙ: ҡулланылған материалдар, эш алымдары, ваҡыт нормаһын үтәү - барыһы ла ҡыҙыҡһындыра һәм даими контролдә тотола, ­ - тинеләр республиканың Торлаҡ-коммуналь хужалыҡ министрлығында.

“Тормош өсөн инфраструктура “ милли проекты ауылдарҙы комплекслы үҫтереүгә маҡсатланған.

Милли проекттар Рәсәй Президенты Владимир Путиндың ҡарары менән тормошҡа ашырыла.

Автор фотоһы.