Сәнәғәттә һанлы игеҙәктәр ниндәй файҙа килтерә ала?

Өфөлә «Сәнәғәттә яһалма зиһен ҡулланып, хәүефһеҙ һанлы игеҙәктәр» темаһына түңәрәк өҫтәл уҙҙы. Сара «Йәштәр һәм балалар» милли проекты (национальный проект «Молодежь и дети») маҡсаттарына ярашлы Рәсәйҙең Фән һәм технологиялар ун йыллығының «Фән эргәлә» башланғысы сиктәрендә ойошторолдо, тип хәбәр иттеләр республика Фәнни-белем биреү үҙәгенең идара итеү компанияһынан.

Түңәрәк өҫтәлдә һанлы игеҙәктәр өлкәһендәге асыштар менән таныштырған компания вәкилдәре, университет хеҙмәткәрҙәре, студенттар, Рәсәй Фәндәр академияһы Өфө федераль тикшеренеү үҙәгенең ғилми хеҙмәткәрҙәре, шулай уҡ иҡтисадтың реаль секторы предприятиелары вәкилдәре ҡатнашты.

Сара барышында һанлы игеҙәктәр өлкәһендәге яңы эшләнмәләр тәҡдим ителде, был иһә әлеге технологияларҙы сәнәғәткә индереүгә бәйле йәнле бәхәс тыуҙырҙы.

- Бөгөн, яһалма зиһен һәм машиналы уҡыу менән берләшеү һөҙөмтәһендә, һанлы игеҙәктәр “йәнле” системаға әйләнә. Улар кире ҡағыуҙарҙы күҙалларға, реаль ваҡытҡа ярашлы эш алымдарын көйләргә, хатта үҙаллы ҡарарҙар ҡабул итеүгә һәләтле. Әммә эксперименттар стадияһынан тулы сәнәғәт файҙаланыуына күсеү күрһәткестәрҙең сифаты, кадрҙар дефициты, киберхәүефһеҙлек мәсьәләләре һ.б. саҡырыуҙар менән оҙатыла, - тип билдәләне Башҡортостан Милли тикшеренеү үҙәгенең идара итеү компанияһы директоры Наталия Латипова.

Секцияла ҡатнашыусылар һанлы игеҙәктәрҙең ысын һөҙөмтәлелеген нисек билдәләү, бөгөн ниндәй аныҡ мәсьәләләрҙе хәл итеүҙәрен һәм был перспективалы технологияларҙы киң таратыуға нимәләр ҡамасаулауын тикшерҙе.

Яңыртылған милли проекттар ил Президенты В.В. Путиндың указына ярашлы, 2025 йылдан тормошҡа ашырыла.

Фото: gtrkrb.ru

Беҙҙең МАХ каналына https://max.ru/gazetabashkortostan ҡушылығыҙ!