Был еңеү – республика халҡының дөйөм ҡаҙанышы

Башҡортостан тағы ла үҙенең Рәсәйҙәге экологик яҡтан иң яуаплы төбәктәренең береһе икәнен раҫланы. “Экология именлеге” милли проектына ярашлы үткәрелгән Бөтә Рәсәй “БумБатл” акцияһының алтынсы миҙгеле һөҙөмтәләре буйынса республика “Эре төбәктәр” категорияһында ғына түгел, ә бөтә ил буйынса абсолют лидер исемен яуланы.

Республикала дөйөм макулатура йыйыу 875,7 тонна тәшкил итте. Башҡортостандың уңышы милли проектҡа ярашлы үткәрелгән системалы экологик эштең законға ярашлы һөҙөмтәһе булып тора. Республика акцияла дүрт йыл рәттән ҡатнаша һәм һуңғы ике миҙгелдә ышаныслы рәүештә алдынғы позицияны биләй. “БумБатл”да еңеү халыҡтың экология эштәренә киң йәлеп ителеүен асыҡ күрһәтә.

– Был еңеү – Башҡортостан халҡының дөйөм еңеүе. Һөҙөмтәне һаҡлау ғына түгел, киләсәктә экологик яуаплылыҡ планкаһын юғары тотоп, уны арттырыуыбыҙға ышанам, – тип билдәләне тәбиғәттән файҙаланыу һәм экология министры Нияз Фазылов.

 “БумБатл” акцияһы ҡалдыҡтарҙы айырым йыйыу культураһын үҫтереү һәм аңлы рәүештә ҡулланыуҙы формалаштырыуға йүнәлтелгән саралар иҫәбенә инә. Унда уҡыусыларҙан алып  эре предприятиелар вәкилдәренә тиклем ҡатнашты.

“Экология именлеге” милли проекты (нацпроект “Экологическая безопасность”) сүп-сар өйөмдәрен артабан да утилләштереүгә, зарарлы объекттарҙы бөтөрөүгә, икенсел сеймалды файҙаланыуҙы дәртләндереүгә йүнәлтелгән. Шулай уҡ йорттарҙа заманса экологик ҡаҙандар урынлаштырыу һәм күмер ҡаҙандарын яңыртыу мәсьәләһе лә ҡарала. Тағы ла бер йүнәлеш – һыу объекттарын тергеҙеү, урмандарҙы һаҡлау, биологик төрлөлөктө һаҡлау. Айырыуса һаҡлауға мохтаж яңы тәбиғәт биләмәләре барлыҡҡа киләсәк.

Фото: “Башҡортостан” дәүләт  телерадиокомпанияһы.