Кадрҙар әҙерләүгә ҙур иғтибар биреләсәк

Башҡортостан дәүләт аграр университетында белем биреү инфраструктураһын яңыртыу бара. Эштәр “Аҙыҡ-түлек хәүефһеҙлеген технологик тәьмин итеү” (“Технологическое обеспечение продовольственной безопасности”) милли проектына ярашлы башҡарыла.

2025 йылда федераль финанслау ярҙамына вуздың 2-се уҡыу корпусы үҙгәртеп ҡоролдо, университет хеҙмәткәрҙәренең 16 ғаиләһе торлаҡ шарттарын яҡшыртты, уҡытыусылар дәртләндереүсе түләүҙәр алды.

– Кадрҙар ҡеүәтен үҫтереү – агросәнәғәт комплексының тотороҡло үҫешен тәьмин итеү тигән һүҙ. Беҙ бөгөн уның ысынбарлыҡтағы һөҙөмтәһен күрәбеҙ – вуздың матди базаһы яңыра, агрокластар селтәре киңәйә, предприятиелар менән бәйләнеш нығый. Милли проект ярҙамында белгестәр әҙерләүҙең заманса системаһы формалаша,– тип билдәләне Хөкүмәт Премьер-министры урынбаҫары - ауыл хужалығы министры Илшат Фәзрахманов.

2026 йылда ла кадрҙар әҙерләү дауам итә. Финанслауҙың дөйөм күләме – 654 миллион һумдан ашыу. Был сумманың 641 миллион һумы федераль бюджеттан. Төп иғтибар университеттың 3-сө корпусын капиталь ремонтлауға һәм йыһазландырыуға биреләсәк. Мәктәптәрҙә агротехнологик белем биреү үҫтереләсәк, 1 сентябрҙә яңы агрокластар райондарҙа асыласаҡ.

Ошо йылдан башлап проектты яңы “Агропрофи” йүнәлеше тулыландырасаҡ. Дөйөм финанслау күләме – 122 миллион һум. Уны алыусылар араһында – Н.М. Сибирцев исемендәге Аксенов агросәнәғәт колледжы һәм Урал аръяғындағы З.Ш. Аҡназаров исемендәге агросәнәғәт колледжы.

Яңы “Аҙыҡ-түлек хәүефһеҙлеген технологик тәьмин итеү” милли проекты Рәсәй Президенты Владимир Путин ҡарары буйынса  2025 йылдың 1 ғинуарынан тормошҡа ашырыла.

Фото:”Башҡортостан” дәүләт телерадиотапшырыуҙар компанияһы.