Уҡыған ил уҙыр, уҡымағаны – туҙыр

2020-2021 йылдарҙа Рәсәйҙең Мәғариф министрлығы мәктәптәр төҙөү программаһын яңы кимәлгә сығарҙы. “Мәғариф” милли проекты буйынса ил күләмендә 115 мең урынға иҫәпләнгән 181 мәктәп һәм 110 мең урынлыҡ 734 балалар баҡсаһы асылған да инде. 2024 йылдың аҙағына тиклем бөтәһе 1300 заманса яңы мәктәп барлыҡҡа киләсәк. Быйыл ғинуарҙа мәктәптәрҙе капиталь ремонтлау федераль программаһы ғәмәлгә инде. Әле ул 1300-ҙән ашыу белем усағын үҙ эсенә ала, ә 2023 йылдың аҙағына өс мең мәктәп бинаһы яңы төҫ аласаҡ.

“Программа ремонт эштәре менән генә сикләнмәй. Бында мәктәптәрҙе комплекслы үҫтереү, инфраструктураны яңыртыу, ҡорамалдар һатып алыу, уҡытыусыларҙың квалифика­цияһын камиллаштырыу хаҡында ла һүҙ бара. Былар барыһы ла беҙгә уңай­лы һәм заманса белем биреү мө­хитен булдырырға мөмкинлек бирә­сәк. Уҡыусыларҙың һәм уҡытыусы­лар­ҙың фекер алышыуҙарҙа ҡатна­шыуы, проекттың мөмкин тиклем асыҡ булыуы мөһим”, – тине Рәсәй мәғариф министры Сергей Кравцов.

“Профессионализм” проекты буйынса 2022 йылдың 1 сентябренән пилот майҙансыҡтарында уҡытыу башлана. 2024 йылға программа 350 меңдән ашыу студентты үҙ эсенә аласаҡ. Һуңғы ике йылда ил колледж­дарында ике меңдән ашыу заманса оҫтахана барлыҡҡа килде, бөгөндән 44 йылдам һөнәри әҙерлек үҙәге эшләй.

Илебеҙ күләмендә балаларҙың йәйге ялын тәьмин итеү кимәле күтә­релде, 2020-2021 йылдарҙа лагер­ҙарҙа 5,5 миллиондан ашыу бала ял итте. Башлыса быға турист кешбэгы про­граммаһы – юллама хаҡының яртыһын ҡайтарыу ярҙамында өлгәшелде.

Балаларҙы һәм йәштәрҙе рухи һәм әхлаҡи ҡиммәттәргә, ирекмәндәр эш­мә­кәрлегенә йәлеп итеүгә, шулай уҡ һөнәри йүнәлеш мәсьәләләренә айырыуса иғтибар бүленә. Мәктәп­тәрҙә тәрбиә эштәре буйынса кәңәшсе вази­фаһы барлыҡҡа килде. Ошондай 2500 кәңәшсе мәктәптәрҙә эшләй ҙә инде.

Ил Президенты В.В. Путиндың май указдары менән раҫланған “Мәғариф” милли проектының “Рәсәй Федера­цияһы граждандарын патриотик тәрбиәләү” федераль проекты эш­ләнде. Ул бөтә ил буйынса мәктәп уҡыусыларын тәрбиәләүҙе ойошто­роуға дөйөм талаптарҙы закондар сығарыу кимәлендә нығыта.

“Мәғариф” милли проектына ярашлы заманса һәм хәүефһеҙ һанлы белем биреү мөхитен булдырыу: ресурс­тарҙы интеграциялау, технологик йыһазландырыу һәм сифатлы белем биреү контентын әҙерләү дауам итә. “Сферум” мәғлүмәт-коммуникация белем биреү платформаһы эшләй башланы, унан 2,5 миллион уҡытыусы, уҡыусы һәм ата-әсә файҙалана.

“Минең мәктәбем” федераль дәү­ләт мәғлүмәт системаһы булдырылды һәм һынау үтә, уның базаһында “Мәғариф контенты китапханаһы” урынлаштырыласаҡ. Мәктәптәрҙе мәғлүмәт системаһына тоташтырыу 2023 йылда ойошторола.

Белем биреү сифаты йәһәтенән илебеҙ ярайһы уҡ үҫеш күрһәтә: Рәсәй уҡыусылары йыйылма команда составында халыҡ-ара олимпиадаларҙа 100-ҙән ашыу миҙал яуланы. 2021 йылда ғына улар халыҡ-ара ярыш­тарҙан 38 миҙал алып ҡайтты: 31 алтын һәм ете көмөш. Дөйөм команда беренселегендә Рәсәй беренсе һәм икенсе урындарҙы биләй.

Мәғариф министры Сергей Крав­цовтың башланғысы менән Бөтә Рәсәй эксперт педагогия советы булдырылды. Ул 2020 йылда асыҡ тауыш биреү юлы менән ҡабул ителде. Структураға 168 педагог инде. Һөҙөмтәле коммуникация майҙансыҡ­тары һәм педагогтар берләшмәһе ме­нән туранан-тура бәйләнеш “Рәсәйҙең йыл уҡы­тыусыһы”, “Рәсәйҙең йыл директоры”, “Рәсәйҙең йыл тәрбиәсеһе”, “Рәсәйҙең уҡытыусы-дефектологы” һәм башҡа һөнәри оҫталыҡ конкурстары ярҙа­мында киңәйеүен дауам итә. Педагог­тар мәғариф һәм тәрбиә биреү сис­темаһын артабан үҫтереү өсөн кә­рәкле сараларҙы әҙерләүҙә ҡатнаша.

Милли проекттарҙы тормошҡа ашырыу ил төбәктәрендә лә үҙ емеш­тәрен бирә. Мәҫәлән, Башҡортостанда “Мәғариф” милли проекты ярҙамында 2024 йылға түңәрәктәрҙә һәм сек­цияларҙа шөғөлләнгән 5 – 18 йәшлек балаларҙың өлөшө 80 процентҡа тиклем артасаҡ. “Мәғариф” милли проекты составында һигеҙ төбәк проекты – “Заманса мәктәп”, “Һәр баланың уңышы”, “Балалы ғаиләләргә ярҙам”, “Һанлы белем биреү мөхите”, “Киләсәк уҡытыусыһы”, “Йәш профессионалдар”, “Һәр кем өсөн яңы мөмкин­лектәр”, “Социаль әүҙемлек”.  2024 йылға Башҡортостанда һанлы һәм гуманитар йүнәлештәр программалары буйынса шөғөлләнгән уҡыусылар һаны 350 мең кешегә етәсәк, тип күҙаллана.

Гөлдәр ЯҠШЫҒОЛОВА