Ҡытай студенттарын Торатау таң ҡалдырған

Ҡытай командаһы Башҡортостанда алған кисерештәре менән уртаҡлашты. Чжан Лулу һәм Кристофер Ньянги Мконо Ухань ҡалаһындағы геология университеты студенттары. Чемпионатҡа тәү сиратта белем алырға, тәжрибә уртаҡлашырға һәм ил күрер өсөн ҡатнашырға булғандар.

Кристофер тыумышы менән Танзаниянан. Ҡытай университетында уҡыр өсөн Хөкүмәт гранты алған.

- Махсус рәүештә геология фәнен һайланым, сөнки беҙҙең илдә ҡаҙылма байлыҡтар, алтын күп. Мине был тармаҡ ылыҡтыра. Университетты тамамлағандан һуң фән менән шөғөлләнергә теләйем, – тип фекерҙәре менән уртаҡлашты студент.

Чжан Лулу иһә яратҡан фәне буйынса уҡытыусы булырға хыяллана. Геолог иң үҙенсәлекле тәбиғәт объекттарын өйрәнә, шуға был һөнәр ылыҡтыра, ти ул.

Студенттар “Патриот” лагерын оҡшатҡан. Һауа торошо ла экскурияларға айырым кәйеф өҫтәй, һыуыҡ та, эҫе лә түгел, ти улар. Айырыуса уларға Торатау шиханына экскурсия оҡшаған. Ҡуштау менән Йөрәктауҙа тикшеренеүҙәр үткәреү онотолмаҫ хәтирә булып ҡалған.

Ҡытай студенттарының тренеры Ирина Жукова Новосибирск ҡалаһынан. Ҡытай университетында геологияны 2019 йылдан уҡыта.

- Минең өсөн был чемпионат йәнә бер тапҡыр тыуған илемдә булып ҡайтыу мөмкинлеге бирҙе. Шуға рәхмәтлемен. Ә Ҡытай студенттарының кисерештәрен һәйбәт аңлайым. Ҡытай – икенсе йыһанда урынлашҡан ил һымаҡ, шуға уларға күнегеп китеүе, яраҡлашыуы ауырыраҡтыр. Уларҙы күп нәмәләр ҡыҙыҡһындырҙы, аптыратты. Шуға ла бер нисә йылдан тағы бында килергә ниәтләйҙәр, - тине Ирина.

Фото һәм мәғлүмәт сығанағы “Республика Башҡортостан” гәзите сайты.