Рөстәм Ғәзизов – Премьер-министр урынбаҫары вазифаһын башҡарыусы

Республика Хөкүмәтендәге бөгөнгө оператив кәңәшмәне Башҡортостан Башлығы Радий Хәбиров яңы тәғәйенләүҙәр менән таныштырыуҙан башланы. Ул БР Премьер-министры урынбаҫары вазифаһын башҡарыусы итеп Рөстәм Ғәзизов тәғәйенләнеүе тураһында белдерҙе. Рөстәм Ғәзизов торлаҡ-коммуналь хужалыҡ, транспорт һәм төҙөлөш мәсьәләләре өсөн яуаплы буласаҡ.

“Һеҙгә, Рөстәм Фәрит улы, ҙур тармаҡ – торлаҡ-коммуналь хужалыҡ, транспорт һәм төҙөлөш өсөн яуаплылыҡ һалына, - тип билдәләне Башҡортостан Башлығы Радий Хәбиров. - Шуға күрә бөгөн министрҙарҙы үҙегеҙгә саҡырыуығыҙҙы, улар менән аралашыуығыҙҙы һорайым. Иртәгә республика Башлығы Хакимиәте Етәксеһе Максим Забелиндан һеҙҙе коллектив менән таныштырыуҙы һорайым. Һеҙгә уңыштар теләйем!»

Шулай уҡ төбәк етәксеһе Бөрйән районының һәм Стәрлетамаҡ ҡалаһының яңы һайланған башлыҡтарына – Рәмил Абдуллин менән Эмиль Шәймәрҙәновҡа эштәрендә уңыштар теләне.

Оператив кәңәшмәлә әйтелеүенсә, бөгөн күпселек муниципалитеттарҙа район һәм ҡала хакимиәттәре башлыҡтарын һайлау буйынса конкурс комиссияһы үҙ эшен тамамланы. 17 муниципалитетта конкурс әле дауам итә. Һайланған башлыҡтар буйынса анализ яһағанда, күп урындарҙа быға тиклем эшләп килгән етәкселәр тағы бер мөҙҙәткә һайланған.

Фото: srgazeta.ru