Һуң булып ҡуймағайы

Күпселек осраҡта ул атеросклероз һәм тромбоз һөҙөмтәһендә барлыҡҡа килә. Ҡайһы берәүҙәр был сирҙәрҙе айырып ҡарамай. Дөйөм һыҙаттар һәм бәйләнеш булыуына ҡарамаҫтан, улар – икеһе ике төрлө ауырыу. Буталсыҡ булмаһын өсөн, һәр береһен айырып ҡарайыҡ.

Атеросклероз – артериялар зарар­ланыуының хроник процесы, ҡан тамырҙа­рының эске стенаһына холестерин ултыра һәм тоташтырыусы туҡыманың үҫеүенә, ҡан йөрөү тамырҙарын тарайтыуға кил­терә. Ә был, үҙ йәһәтендә, ҡан тейешле миҡ­дарҙа теге йәки был органға барып етмә­гәнлектән, кислородҡа ҡытлыҡ тыу­ҙыра. Был хәлде ваҡытында туҡтат­ма­ғанда, ҡан тамырҙарының тулыһынса тығылыуы, хатта каналдың өҙөлөүе ихтимал.

Тромбоз ҡан тамырҙарына холестерин ултырыуы һәм һығылмалылыҡ юғалты­лыуы арҡаһында түгел, ә ҡан төйөрҙәре хасил булыуы һөҙөмтәһендә барлыҡҡа килә. Быға бер нисә фактор сәбәпсе. Киң таралғаны – йәштең өлкәнәйеүе. Ҡан ойошоуы менән бәйле проблемалар ҙа тромбозға килтереүе мөмкин.

Ҡан тамырҙарының тығылыуын, тарайыуын иҫкәртеүҙең ниндәй юлдары бар? Өс төп ҡағиҙәне иҫтә тотоу кәрәк: дөрөҫ туҡланыу, физкультура менән шөғөлләнеү, зарарлы ғәҙәттәрҙе үҙ итмәү. Өҫтәүенә медицина тикшеренеүен даими үтеп тороғоҙ.

Иң файҙалы аҙыҡтар – сейә һәм йәшел сәй. Тәүгеһендә ҡан ойошоуын кәметеүсе кумарин булһа, йәшел сәйҙә тромб бар­лыҡҡа килтереүҙә хәүефле роль уйнаған ферменттарға ҡаршы торған рутин бар. Эре океан балығы тунец был йәһәттән иң файҙалыһы иҫәпләнә. Иң зарарлы аҙыҡтарҙың береһе – маргарин. Артыҡ майлы аҙыҡ ашауҙан, урамда һатылған төрлө бәлеш, бөйөрөк алыуҙан тыйылығыҙ. Пальма һәм кокос майҙары, ҡош-ҡорт тиреһе, аҡ һәм иретелгән майҙар ҙа холестерин кимәленең артыуына булыша. Туҡланыу рационына күберәк йәшелсә, емеш-еләк, сәтләүек индерергә тыры­шығыҙ. Йөҙөү, йүгереү, контраст душ сәләмәтлек өсөн ифрат файҙалы.

Ғөмүмән, сирҙе иҫкәртеү тураһындағы һорауҙарығыҙ менән иң тәүҙә табипҡа мөрәжәғәт итегеҙ. Иң яҡшы кәңәште бары ул ғына бирә, кәрәккәндә дауаһын да билдәләр.