Ҡарағайлыҡтағы дауаханала

Үҙәк район дауаханаһында ҙур тө­ҙө­лөш эштәре башҡарылғанына ла етәксе һөйөнөп бөтә алмай, ҡаҙанлыҡ, йы­лылыҡ селтәре яңыртылған. “Һәр па­латала крандан йылы һыу килә, ауы­рыуҙар өсөн шарттар яҡшырҙы”, – ти ул. Ике ҡатлы терапия корпусында капиталь ремонт барыуына шаһит булдыҡ, эш барышы менән ҡы­ҙыҡһындыҡ.

Дауахананың хужалыҡ эштәре мө­ди­ре Илдар Ибәтуллин әйтеүенсә, корпустың иҫке тәҙрәләре яңы пластик тәҙрәләргә алмаштырылған. “Иҙәнгә матур плитәләр түшәлә, ишектәр, йылытыу системаһы яңыр­тылды”, – ти ул.

Радик Ҡәнзел улы һәр ерҙә лә ҙур проблемаға әүерелгән кадрҙар ҡытлы­ғына зарланмай. “Әлбиттә, беҙ, неврология, онкология, терапия буйынса бел­гестәр килһә, һөйөнөр генә инек. Әлегә табиптар бер-береһен алмаштырып эш­ләй, көсөргәнешле хәлдән үҙебеҙҙең көс менән сығырға тырышабыҙ. Өс йыл түҙһәк, үҙебеҙҙең өс йәш белгесебеҙ районға эшкә ҡайтасаҡ, яңы көстәргә һәр саҡ шат­быҙ. Туймазы медицина колледжы етәк­селегенә рәхмәт, кадрҙарҙы уҡытып ебәреп тора.

Алты йыл эсендә “Ауыл табибы” программаһы буйынса беҙгә туғыҙ табип эшкә килде, грант алыуға өлгәшкән дүрт фельдшерлы булдыҡ”, – ти ул.

Фельдшерҙарға ғәйәт мөһим, ауыр эш йөкмәтелгән. Мәҫәлән, Ерекле фельдшер-акушерлыҡ пунктына меңдән ашыу кеше беркетелгән. Бер фельдшер барыһына ла өлгөрөргә, ҡабул итергә, дауаларға, эште ойоштора белергә тейеш. Аҡ халатлы коллегаларының һәр береһенә етәксенең йылы һүҙҙәре етерлек. Шаран халҡының һаулығын хәстәрләүсе медицина хеҙ­мәткәрҙәренең үҙҙәренә лә ныҡлы сә­ләмәтлек, уңыштар насип итһен.

– Ғөмүмән, йәшәгән төбәгебеҙ үҙе шифахана тиерһең, бындай матур, үҙен­сәлекле тәбиғәткә ситтән килгән туристар, ҡунаҡтар һоҡланып бөтә алмай. Беҙҙең дауахананың ҡәләмдәй төҙ, мөһабәт ҡарағай ағастары эсендә урынлашҡанына иғтибар иткәнһегеҙҙер, ҡорамалдарҙы яңыртып, ремонт эштәрен теүәлләһәк, шифахананан кәм еребеҙ булмаҫ, – тип шаяртырға ла онотманы Радик Ҡәнзел улы.