+17 °С
Ясно
Сәләмәт булайыҡ
11 Сентября 2019, 07:03
Иҫкәртеүҙең иң һөҙөмтәле ысулы – вакцинациялау
Киҙеү осоро етте: күҙгә күренмәгән дошман – вируслы инфекциялар таралған ваҡыт. Йәйҙән һуң көндәрҙең бер аҙ һалҡыная башлауы шунда уҡ үҙен һиҙҙертә: поликлиникаларҙа сирләүсе балаларҙың сираты ҙурая, мәктәптәрҙә лә йүтәлләүсе, мышҡылдаусы уҡыусылар һаны арта. Ул ғынамы һуң: бәғзе өлкәндәр ҙә был осорҙа баш ҡалҡытҡан киҫкен респиратор вируслы сирҙәргә бирешеүе ихтимал. Шуға күрә иҫкәртеү сараларын хәтергә төшөрөргә, иммунитетты нығытыуҙы хәстәрләргә кәрәк.
Быйыл 1,83 миллион кешегә киҙеүгә ҡаршы прививка яһаласаҡ.
Киҙеү осоро етте: күҙгә күренмәгән дошман – вируслы инфекциялар таралған ваҡыт. Йәйҙән һуң көндәрҙең бер аҙ һалҡыная башлауы шунда уҡ үҙен һиҙҙертә: поликлиникаларҙа сирләүсе балаларҙың сираты ҙурая, мәктәптәрҙә лә йүтәлләүсе, мышҡылдаусы уҡыусылар һаны арта. Ул ғынамы һуң: бәғзе өлкәндәр ҙә был осорҙа баш ҡалҡытҡан киҫкен респиратор вируслы сирҙәргә бирешеүе ихтимал. Шуға күрә иҫкәртеү сараларын хәтергә төшөрөргә, иммунитетты нығытыуҙы хәстәрләргә кәрәк.
Вакцина яһатыу киҙеүҙе, киҫкен респиратор инфекцияларҙы иҫкәртеүҙең иң һөҙөмтәле ысулы булып ҡала. Ул профилактик прививкаларҙың милли календары сиктәрендә башҡарыла, вакцина республикаға федераль ҡаҙна иҫәбенә ҡайтарыла. Унан тыш, йыл һайын республика ҡаҙнаһы иҫәбенә милли календарға инмәгән кешеләргә прививка яһау өсөн өҫтәмә рәүештә вакцина һатып алына.
Быйыл Башҡортостанда киҙеүҙән (грипп) халыҡтың 45 процентын вакцинациялау күҙаллана. Һандарға килгәндә, һүҙ 1,83 миллион кеше, шул иҫәптән 418 мең бала тураһында бара. Был хаҡта республиканың һаулыҡ һаҡлау министры вазифаһын башҡарыусы Максим Забелин белдерҙе.
Ведомство етәксеһе әйтеүенсә, вакцинациялау осоронда айырым иғтибар балаларға, ауырлы ҡатындарға, хроник сирле кешеләргә, 60 йәштән ололарға, медицина хеҙмәткәрҙәренә бүленәсәк. Анығыраҡ әйткәндә, биш мең ауырлы ҡатын-ҡыҙға прививка яһау күҙаллана. Профилактик саралар 15 ноябрҙә тамамланырға тейеш.
Киҙеү ҙә, респираторлы сирҙәр ҙә бер үк төрлө башлана: температура күтәрелә, организмда хәлһеҙлек күҙәтелә. Тымау, йүтәл йонсота. Әммә киҙеү йоғошло вируслы сирҙәрҙән ауыр үтеүе, өҙлөгөүҙәргә – бронхит, үпкә шеше, отит, синусит сирҙәренә юлыҡтырыу ихтималлығы менән айырыла.
Белгестәр иҫкәртеүенсә, әгәр ҙә һеҙ үҙегеҙҙә хәлһеҙлек, киҫкен респиратор инфекция билдәләрен тойһағыҙ, медицина учреждениеһына мөрәжәғәт итергә кәрәк. Балалар сирләгән осраҡта уны мәктәпкә йә иһә башҡа йәмәғәт урындарына ебәрмәгеҙ – дауаланһын, өйҙә булһын. Эшләп йөрөгәндәргә лә коллективты зарарламаҫ өсөн унда бармау фарыз – киҙеү тиҙ йоға. Табиптар үҙ белдегең менән дауаланыуҙы хупламай – дауаланыу схемаһын квалификациялы белгес кенә билдәләй ала.
Табиптар бер һүҙҙән шуны әйтә: киҙеүҙе (грипп) һәм башҡа вируслы инфекцияларҙы иҫкәртеүҙә иң тәьҫирле сара – вакцинация. Билдәләп үтеүебеҙсә, ул йыл да халыҡҡа, сир башланырҙан ике-өс айға алда федераль бюджет иҫәбенә үткәрелә. Эш биреүсе иҫәбенә лә, граждандың үҙ аҡсаһына ла прививка яһатырға мөмкин.
Вакцинация киҙеүҙән өҙлөгөү хәүефен бер нисә тапҡырға кәметергә һәләтле. Прививкаларға килгәндә, улар тулыһынса тикшерелгән һәм организм өсөн хәүефһеҙ, әммә бик тәьҫирле. Медицина учреждениеларында тәҡдим ителгән барлыҡ вакциналар Рәсәйҙә теркәлеү үткән һәм ҡулланыуға рөхсәт ителгән.
Киҙеүҙең төп ҡурҡынысы – ул тиҙ үҫешә, һаулыҡ һәм ғүмер өсөн хәүефле булған ҡатмарлы пневмонияға алып килеүе ихтимал. Сиргә айырыуса балалар, оло йәштәгеләр тиҙ бирешә.
Нисек кенә булмаһын, ауырыу билдәләрен тойоу менән табипҡа мөрәжәғәт итегеҙ. Киҙеү аяуһыҙ – уны ваҡытында һәм дөрөҫ дауаламау һаулыҡҡа ифрат ҙур зыян килтереүе, хатта үлемесле осраҡҡа еткереүе ихтимал.
Дөйөм алғанда, сир кинәт кенә аяҡтан йыҡмаһын өсөн, туҡланыуығыҙ файҙалы булһын, йылыраҡ кейенеп йөрөгөҙ, йоҡоғоҙҙо туйҙырығыҙ һәм, иң мөһиме, прививка яһатырға онотмағыҙ.
