Ул бигерәк тә ололарға файҙалы

Скандинав хәрәкәте ваҡытын­да мейелә ҡан әйләнеше яҡшыра, йөрәккә көс инә, ҡан тамырҙары нығына, нервылар тыныслана, йоҡоһоҙлоҡтан ҡотҡара, калориялар әүҙем юғалыу һөҙөмтәһендә артыҡ ауырлыҡ кәмей, хәрәкәт ышаныслы булып китә, үпкә кислород менән туйына, дөйөм ал­ғанда, организм нығына, йәшәрә. Шулай ҙа һәр бер спорт төрөнөкө кеүек уның да кире күрһәтмәләре бар: вируслы, инфекциялы сир­леләргә, гипертониктарға, диабет­тың ҡатмарлы стадияһында­ғыларға, шулай уҡ яңы ғына инсульт, инфаркт үткәреүселәргә скандинавса йөрөү тыйыла.

Был спорт менән ҡыҙыҡ­һыныу­сыларға дөйөм ҡағиҙәләргә иғти­бар итергә кәрәк: алдан разминка эшләү, хәл бөткәнсе йөрөмәү (яңы башлағандарға тәүҙә 15 минут та етә, даими йөрөүселәргә – бер сәғәт), ҡағиҙә буйынса, ауыр­лыҡты тигеҙ бүлеп, тынды дөрөҫ алып хәрәкәт итеү – иң мөһим факторҙар. Таяҡты ла белеп һай­ларға кәрәк: кәүҙә оҙонлоғоғоҙҙо 0,66 һанына ҡабат­лағас килеп сыҡҡан күрһәткес һеҙгә тап килә. Мәҫәлән, буй 165 см икән (165-те ҡабатлайбыҙ 0,66-ға), тимәк, 109 см бейеклегендәге таяҡ кәрәк.

Скандинавса йөрөүҙе тәнде алдан яҙмай тороп башларға ярамай (15 минут буйы муйын, аяҡ-ҡул, билдең мускулдарын төрлө физик күнегеүҙәр ярҙамында ҡыҙҙырып алырға кәрәк). Хәрәкәт иткәндә ҡағиҙәләрҙе дөрөҫ баш­ҡарыу мөһим. Һул аяҡты алға баҫҡанда уң ҡул артта ҡала һәм киреһенсә. Хәрәкәт тәбиғи, көсөр­гәнешһеҙ булырға тейеш. Был ваҡытта таяҡтар ергә һөйрәлмәй, ә әүҙем ҡатнаша, арттағы таяҡ осо­ноң ергә ҡырын барып ҡа­ҙалыуын тойорға тейешһегеҙ. Ҡул хәрәкәттәре тыныс, яурындан уҡ башлана. Кәүҙә саҡ ҡына алға эйелә, ауырлыҡты еңелсә алғы таяҡҡа һалабыҙ. Аяҡты шыуҙы­рып атламайбыҙ, тәүҙә үксәгә, шунан бармаҡ остарына баҫабыҙ. Тынды танау аша ике аҙым һайын алабыҙ, дүртенсе аҙымда ауыҙ аша сығарабыҙ.

Атлап килгәс, шунда уҡ туҡ­тарға ярамай. Уны талғын физик күне­геүҙәр менән тамамлап ҡуйыу зарур. Тәүҙә тәрән тын алып йө­рөп алығыҙ, шунан таяҡ ярҙамын­да төрлө күнегеүҙәр яһағыҙ.

Күренеүенсә, ҡағиҙәләр ябай, сығымы ла әллә ни күп түгел, ә файҙаһы ифрат ҙур. Рәхәтләнеп саф һауала йөрөгөҙ, шул ваҡытта һаулыҡ, һығылмалылыҡ, көс һеҙҙе оҙаҡ ташламаҫ, кәйефегеҙ һәр саҡ күтәренке булыр.