Рәхмәт һүҙҙәрен ишетеүе рәхәт

– Өфөләге 1-се медицина учили­щеһын тамамлағас, хеҙмәт юлымды Ейәнсура район дауаханаһында теш технигы булып башланым, – ти Илдар Ғәле улы. – Унан инде Стәрле­тамаҡ ҡалаһында эшләп алдым. Шулай ҙа тыуған яҡтар үҙенә тартты. 2007 йылда иптәшем Гүзәл Ирек ҡыҙы менән үҙ клиникабыҙҙы асырға булдыҡ.

“Евродент” яуаплылығы сиклән­гән йәмғиәтенең даны тирә-яҡҡа таралған. Төхвәтуллиндарҙың кли­ни­каһына ҡайҙан ғына килмәйҙәр. Стоматолог Илдар һәм Гүзәл Төхвә­туллиндар менән бергә тәүге көн­дәрҙән үк ҡулға-ҡул тотоношоп эшләгән тәжрибәле шәфҡәт туташтары Әлмира Шарыгина, Альбина Абрамова, теш технигы Денис Тү­ле­баев, санитар Оксана Максимова һәр көн иртәнге сәғәт 9-ҙан киске 7-гә тиклем халыҡҡа теш дауалау, профилактикалау буйынса төрлө хеҙмәт­тәр күрһәтә. Заманса медицина йыһаз­дары менән тәьмин ителгән клиникала даими клиенттарға, инва­лидтарға, ветерандарға, студенттарға ташлама яһала. Әйткәндәй, клини­каға түбәндәге адрес һәм телефон номеры буйынса мөрәжәғәт итә алаһығыҙ. Ейәнсура районы, Иҫәнғол ауылы, Һәҙиә Дәүләтшина урамы, 29, 8 (34785) 2-12-75.

– Беҙҙең маҡсат – халыҡ һау­лығын ҡайғыртыу, ауырыуҙарға ярҙам ҡулы һуҙыу, һауыҡтырыу. Бының өсөн тормош иптәшем Гүзәл Ирек ҡыҙы менән бар көсөбөҙҙө һалабыҙ, – ти Илдар Ғәле улы. – Клиникаға килеп тештәрен дауалат­ҡан клиенттары­быҙҙан рәхмәт һүҙҙәрен ишетеү эшебеҙҙә дәрт, көс өҫтәй.

Һайлаған һөнәренән дә, ҡаты­нынан да, эшләгән коллективынан да уңған Илдар Төхвәтуллин. Балалары Элина менән Линар ата-әсәһенең юлын дауам итерме, икенсе һөнәр һайлармы – әлегә билдәһеҙ. Шулай ҙа улар ата-әсәһенең тырыш булыуҙарын аңлап, өлгө алып үҫә.

Ейәнсура районы.