Бирешмә!

l Иң тәүҙә уйҙарығыҙҙы кон­трол­ләргә өйрәнегеҙ.

l Тәмәкенән ваз кисегеҙ. Дөрөҫ туҡланығыҙ.

l Тик ултырырға ғәҙәтлән­мәгеҙ, даими хәрәкәттә булығыҙ.

l Тән ауырлығын нормала тотоғоҙ, ауырайып китһәгеҙ, ябығырға тырышырға кәрәк.

l Ҡанығыҙҙағы холестерин кимәлен беләһегеҙме? Туңдырғыс һәм тауыҡ ите тиреһен ашауҙан тыйылығыҙ, сөнки уларҙа ҙур миҡдарҙа холестерин һәм токсиндар тупланған.

l Ит һәм сыр ашауҙы ла кәметегеҙ. Уларҙы балыҡ һәм эремсек менән алыштырығыҙ.

l Сәләмәт кеше өсөн тоҙ нормаһы биш грамдан артмаҫҡа тейеш (бер балғалаҡ самаһы). Тоҙ организмда һыуҙы тота һәм ҡан баҫымын арттырырға булыша.

l Кешенең нисек ял итеүенә, йоҡо сифатына бөтә ағзаларҙың эшмәкәрлеге бәйләнгән. Ятыр алдынан бүлмәне елләтеү, шифалы үләндәр һалынған мендәрҙә йоҡлау бик файҙалы.

l Киске аш майлы, калориялы аҙыҡтан торорға тейеш түгел. Ә шифалы үләндәрҙән яһалған сәй һеҙҙең сәләмәтлек файҙаһына. Бер балғалаҡ бал һалынған йылы һөт – йоҡоһоҙлоҡтан арыныуҙа һынал­ған сара. Йоҡлар алдынан тик яҡшы,

күңелле хәл-ваҡи­ғаларҙы күҙ алдына килтерегеҙ. Ялмы, байраммы, һәр саҡ бер ваҡытта йоҡларға ятығыҙ һәм тороғоҙ.

l Ә бына стресҡа бирешмәү өсөн йога һәм медитация менән шөғөлләнеү файҙалы. Бимаза­лаған проблемаларығыҙҙы ситкә ҡуйып тороп, тәбиғәттә булыу, магазиндар буйлап йөрөү, матур­лыҡ салондарына барыу, прическа йәки маникюр яһатыу ҙа кәйефегеҙҙе күтәрер. Шулай итеп, ҡыҫҡа ғына ваҡытҡа булһа ла, һеҙ нервы системаһына һәм баш мейеһенә ял бирәһегеҙ тигән һүҙ. Дуҫ-иштәрегеҙ менән бергәләп мунсаға барыу, ҡыҙыҡлы осра­шыуҙар борсолоуҙарҙан ары­нырға ярҙам итер. Хәл ителмәй торған мәсьәлә юҡ ул, бары сәбәләнмәй, йөрәккә ауыр алмай, көсөргәнешле мәлдән сығыу яйын эҙләргә, табырға кәрәк.