+21 °С
Болотло
Сәләмәт булайыҡ
29 Май 2020, 07:04
Туғыҙ сәбәбе бар...
Ҡайһы берәүҙәр ҡысыныуҙан яфалана. Әгәр был сир ике аҙнанан ашыу дауам итһә, өҫтәүенә башҡа билдәләр ҙә күҙәтелһә, бөтә тәнгә таралһа, көтмәгәндә ҡапыл ҡуҙғып китһә, мотлаҡ табипҡа күренергә кәрәк. Ауырыуҙың сәбәптәре төрлө булыуы ихтимал.
Ҡайһы берәүҙәр ҡысыныуҙан яфалана. Әгәр был сир ике аҙнанан ашыу дауам итһә, өҫтәүенә башҡа билдәләр ҙә күҙәтелһә, бөтә тәнгә таралһа, көтмәгәндә ҡапыл ҡуҙғып китһә, мотлаҡ табипҡа күренергә кәрәк. Ауырыуҙың сәбәптәре төрлө булыуы ихтимал. Бына шуларҙың ҡайһы берҙәре:
Психологик кисерештәр арҡаһында.
Ҡайһы саҡта тәндең ҡысыуы менталь сәләмәтлектәге депрессия, эске көсөргәнеш, психоз, төрлө фобиялар кеүек кәмселектәргә бәйле. Был сирҙең төп үҙенсәлеге: кешегә тиреһендә (ҡайһы саҡта тире аҫтында) йәки тәнендә нимәлер йөрөгәндәй тойола.
Шәкәр диабетынан.
Был сир эндокрин системаның эшмәкәрлеген боҙа: организмда гормондарға ҡытлыҡ тыуа, һөҙөмтәлә кеше фекер тарҡаулығынан, хәлһеҙлектән, ҡысыныуҙан яфалана.
Ҡайһы бер дарыуҙарҙан.
Гипертонияны, йөрәк аритмияһын һәм подаграны дауалау препараттары, эстрогенлы дарыуҙар, опиоидтар ҡулланыу һөҙөмтәһендә тәндең туҡтауһыҙ ҡысыуы ихтимал. Бындай осраҡта табип менән кәңәшләшеү шарт. Ул һеҙгә бүтән төрлө дарыу яҙыр.
Йөклөлөккә бәйле.
Йөклө ҡатындарҙа тән ҡысыуы һирәк булһа ла осрай. Буласаҡ әсәләрҙә уның даими күҙәтелеүе йәки ҡайһы саҡта ғына ҡуҙғып китеүе ихтимал.
Биҙәнеү әйберҙәренән.
Тәнгә һөртә торған химик сараларҙың ҡайһы берәүҙәргә килешмәүе лә бар. Лосьон, йыуыныу өсөн гель, һабын, ҡояштан һаҡлай торған крем – уларҙың компоненттары йыш ҡына аллергия тыуҙыра. Килешмәгән косметиканы асыҡлаһағыҙ, уны ҡулланыуҙы туҡтатып, гистаминға ҡаршы препарат эсегеҙ.
Бауыр ауыртыуҙан.
Цирроз йәки гепатит булғанда, тән тиреһенең ҡысыуы һәм һарғайыуы ихтимал.
Артыҡ тирләүҙән.
Ҡайһы бер ныҡ тирләгән кешеләр ҙә тән ҡысыуынан яфалана. Уларға даими йыуынырға, кейемде йышыраҡ алмаштырырға һәм тәбиғи туҡыманан тегелгән кейем кейергә кәңәш ителә. Әгәр тән ҡысыуы ҡапыл ҡуҙғып китһә, эндокринологка йәки терапевҡа күренегеҙ.
Яман шештән.
Тәндең ҡысыуы шулай уҡ ҡан системаһындағы, ашҡаҙан аҫты биҙендәге яман шешкә йәки Ходжкин лимфомаһына бәйле булыуы ихтимал.
Бөйөр сирҙәренән.
Бөйөр дөрөҫ эшләмәһә, организмда азот берләшмәләре туплана. Улар тир менән бергә сығып, тирелә йыйыла, тәндең ҡысыуына килтерә.
Тән ҡысыуы туҡтауһыҙ яфалай икән, ниндәй ҙә булһа сара күрерҙән алда, мотлаҡ дерматолог, инфекционист йәки терапевт менән кәңәшләшергә кәрәк.
