Күҙеңә ҡарап та хәлеңде беләсәктәр

Ғалимдар 2012 – 2017 йылдар­ҙа дауаханаларҙа ятҡан 870 па­циенттың күҙ һүрәттәрен фай­ҙа­ланған. Ауырыуҙарҙы ике төр­көм­гә бүлгәндәр – күҙ ҡараһы ҙур һәм күҙ ҡараһы бәләкәй бул­ған төркөмдәргә. Ике йыл дауамында һәр береһенең һаулыҡ то­­рошон ентекләп күҙәткәндәр. Асыҡла­ныуынса, күҙ ҡараһы бә­ләкәй бул­ған сирлеләр, тәүге төр­көмдәге ауырыуҙар менән сағыштырғанда, ике тапҡырға к­үберәк һәләк бул­ған. Бынан тыш, улар дауаханаға ла йышыраҡ эләккән.

“Беҙҙең эш һөҙөмтәләре күҙ ҡараһын күҙәтеүҙең мөһимлеген, уның үлем хәүефе алдында тор­ған пациенттарҙы асыҡлауҙа яңы ысул булыуын күрһәтте, – тип билдәләгән доктор Кохей Нозаки. – Был табиптарға ваҡы­тында сара күрергә, ауырыуға ярҙам ҡулы һуҙырға ярҙам итәсәк”.

Донъяла йөрәктең хәлһеҙ­ле­генән 25 миллиондан ашыу кеше яфалана. Ул миокард функцияһы боҙолоуы арҡаһында барлыҡҡа килә һәм күҙәнәк-ара шыйыҡлыҡ күләме артыуында, ағзалар һәм туҡымалар перфузияһы кәме­үендә сағыла.

Йөрәк хәлһеҙлегенең нисек кө­сәйеүенә ҡарап, уны киҫкен һәм хроник төрҙәргә бүләләр. Тәү­геһе төрлө имгәнеүҙәр, ток­син­дар, йөрәк сирҙәре менән бәй­ле булыуы һәм дауаланма­ғанда үлемгә дусар итеүе ихтимал. Сирҙең хроник төрө оҙаҡ үҫешә, уның үҙенә хас билдәләре бар (тын ҡыҫы­лыуы, арыу, ше­шенеү). Ауы­рыуҙың хәлен асыҡ­лау өсөн ышаныслы ысул кәрәк, япон­дар­ҙың был асышы йөрәк хәлһеҙ­ле­генән яфаланғандарҙы дауа­лауҙа тәьҫир­ле булыуы мөмкин. Тик был ысул күҙҙәре сәләмәт бул­маған ауырыуҙар өсөн бармаясаҡ.

Кардиологтар фекеренсә, йөрәк эшмәкәрлегендә хәлһеҙлек хәүефен кәметеү өсөн тоҙ ҡул­лан­ыуҙы сикләргә кәрәк. 12 йыл буйы тикшеренеүҙәр алып барған табиптар шундай һығымтаға килгән.