Йәшлек билдәһе ул шафталы

Ул – хуш еҫле, татлы емеш, юғары антиоксидантлы туҡланыу матдә­ләренә бай ҡиммәтле сыға­наҡ. Витаминдарға, фолий һәм ҡәһүә кислоталарына бай. Ҡояш йылы­һында бешкән емеш сирҙәр­ҙән йонсоған организмға ҙур файҙа килтерә, уны нығыта, һыуһынды ҡандыра, һыу-тоҙ тигеҙлеген һаҡлай. Шафталы һуты ашҡаҙан әселеге түбән булғанда, эс ҡатҡанда, гас­триттан яфаланғанда ярҙам итә, үҙәк көйөүҙе иҫкәртә.

Хатта шафталы ағастарының орлоғо һәм сәскәләре экстракттарын һөт биҙе, эсәклек шештәрен иҫкәр­теүҙә һәм дауалауҙа уңышлы файҙаланалар. Ундағы К витамины бауыр һәм бөйөр эшмәкәрлеген яҡшырта. Епсәләргә һәм желатинға бай булыуы йыуан эсәктең таҙа­рыныу процесына ярҙам итә. Тағы ла мөһим үҙенсәлеге – емештә калий һәм магний күп миҡдарҙа тупланған. Йөрәк ритмын көйләүҙә һәм йөрәк мускулын нығытыуҙа был микроэлементтар файҙалы.

Унда фосфор ҙа етерлек ки­мәлдә, ул мейе эшмәкәрлеген, хә­тер­ҙе яҡшырта, ә каротин күҙ үткер­легенә ыңғай тәьҫир итә. Үпкә, анемия сирҙәрен дауалағанда ла бик файҙалы, цинктың күп булыуы гормондар кимәлен нормалләштерә, простата сирен иҫкәртә.

Бына ниндәй икән ул Көнсығыш емеше! Уның ярҙамында организмы­ғыҙҙы етешмәгән микроэлементтар, витаминдар менән йәй эсендә туйындыра алаһығыҙ. Көнөнә ике шафталы ашаһағыҙ, тирегеҙ бәрхәттәй йомшарып, матурланып китер. Шуныһын да хәтерҙә тотоғоҙ: был емештә шәкәр һәм углевод күп, аллергиянан яфаланғандарға, диабет менән сирләгәндәргә, ашҡаҙан әселеге юғары булғандарға унан баш тартырға тура киләсәк.