+21 °С
Болотло
Сәләмәт булайыҡ
9 Октябрь 2020, 18:33
Робот-хирург ярҙамға килә
Илдә “Һаулыҡ һаҡлау” милли проектына ярашлы алынған заманса ҡорамалдар, яңы технологиялар халыҡ һаулығын яҡшыртыуға хеҙмәт итә.
Илдә “Һаулыҡ һаҡлау” милли проектына ярашлы алынған заманса ҡорамалдар, яңы технологиялар халыҡ һаулығын яҡшыртыуға хеҙмәт итә.
Өфөлә робот-хирург ярҙамында бауырға тәүге операция яһалды. Гастроэнтерологтар үҙ тәжрибәһендә беренсе тапҡыр мөғжизәле ярҙамсыны ҡулланды. Табиптар робот ярҙамында 30 йәшлек пациенттың бауырындағы шеш төйөрсәһен алып ташланы. Бауырға яһалған тәүге операция уңышлы үтте.
Башҡортостан дәүләт медицина университеты клиникаһында Да-Винчи системаһы 2018 йылда эш башлай. Ошо осорҙа урология, гинекология, нейрохирургия, колопроктология өлкәләрендә меңгә яҡын операция үткәрелә. Клиниканың хирургия бүлексәһе мөдире Фәрит Нагаев әйтеүенсә, операция яһаласаҡ урын ун тапҡырға ҙурайтыла, операция бәләкәй генә тишемдәр аша үткәрелә. Үтеп инеү ауыр булған участкала ювелир теүәллеге менән яһалғанлыҡтан, ҡан аҙ юғалтыла, өҙлөгөүҙәр хәүефе юҡ.
Да-Винчи системаһын файҙаланыу операция ваҡытын ғына түгел, ә реабилитация срогын да ҡыҫҡарта. Ауырыуҙар ике-өс тәүлектән һуң өйҙәренә ҡайтып та китә. Робот-хирург – бөтә Волга буйы федераль округында берҙән-бер. Илдә бөтәһе – 30. Бары Башҡортостанда ғына операция бушлай яһала.
