Йөрәгегеҙ һеҙгә рәхмәт әйтер!

– Акцияларҙың төп маҡсаты – кешеләргә үҙең тураһында хәс­тәр­лек күреүҙең ни тиклем әһә­миәт­ле булыуын һәм ваҡытында квалификациялы ярҙам алыуҙың мөһимлеген иҫкә төшөрөү. Һау йөрәк ныҡлы сәләмәтлек билдәһе генә түгел, ә мөхәббәт символы ла, унһыҙ бәхетле кеше булыу мөм­кин түгел. Беҙ һеҙҙе йөрәге­геҙҙе яратырға һәм уның мәнфә­ғәттәрендә яҡшы ғәмәлдәр ҡы­лырға саҡырабыҙ. Иҫегеҙгә төшө­рәм, аҙ хәрәкәтләнеүсән, ултырып йәшәү рәүешен үҙ иткән кеше­ләр­ҙә артериаль гипертония әүҙем үҫешкән, физик күнегеүҙәр менән шөғөлләнгәндәр менән сағыштыр­ғанда, 20–50 процентҡа юғарыраҡ, –тип билдәләне “Милли өҫтөн­лөк­тәр” автономиялы коммер­ция­ға ҡарамаған ойошманың генераль директоры София Малявина.

“Рәхмәт, йөрәк!” акцияһына ярашлы, Takzdorovo.ru порталында махсус бүлек булдырылған. Маҡсаты – кешеләргә гипертония үҫеше хәүефе, сир билдәләре тураһында мәғлүмәт биреү, уны иҫкәртеү һәм контролләү. “Ирек­мән-табиптар” ойошмаһы менән берлектә үткәрелгән “Йөрәктәрҙе һаҡлап” акцияһы күптәргә йөрәк сәләмәтлеген тикшертергә ярҙам итте. Мини-уйындар, квиз-викториналар, скандинавса йөрөү, күнегеүҙәр һәм башҡа ҡыҙыҡлы саралар мауыҡтырғыс булды. “Оберегая сердца.рф” сайтында бөтә файҙалы мәғлүмәтте табырға мөмкин. Өҫтәүенә, сәләмәтле­гегеҙҙе баһалау өсөн тест үтә, алдағы 10 йылға һаулығығыҙ торошон күҙаллай алырһығыҙ.

– Бөгөн йөрәк һәм ҡан та­мырҙары системаһы сирҙәре Рә­сәйҙә һәм донъяла үлем осраҡта­рының төп сәбәбе булып тора. ”Йөрәктәрҙе һаҡлап” акцияһы халыҡтың сәләмәтлекте һаҡлау буйынса белемен арттырыуҙа һәм сирҙәр үҫеше хәүефен кәметеүҙә ҙур әһәмиәткә эйә булыр тип уйлайым, – тине Бөтә Рәсәй “Ирек­мән-табиптар” йәмәғәт хәрәкәте рәйесе Павел Савчук.

Статистиканан күренеүенсә, ил­дә артериаль гипертониянан ҡатын-ҡыҙҙың һәм ир-аттың 40 про­центы яфалана. Артериаль ба­ҫымдың кимәленең 140/90 булыуы һеҙҙә сир башланғанын раҫлай.

Ошо ябай ғына кәңәштәрҙе үтәргә тырышығыҙ: кәүҙә ауыр­лығын контролдә тотоғоҙ, зарарлы ғәҙәттәрҙән баш тартығыҙ, физик көсөргәнеште арттырығыҙ, тоҙҙо аҙ ҡулланығыҙ, туҡланыу режимын теүәл үтәгеҙ, артериаль ҡан баҫымын көн дә яҙып барығыҙ. Шул саҡта йөрәгегеҙ һеҙгә рәхмәт әйтер!