Аҡ теләктәр менән

Ул саҡтарҙа фельдшер-акушер­лыҡ пункты ауыл мәктәбе бинаһында урынлашҡан бер уңайлылығы бул­маған һыуыҡ, шыҡһыҙ бүлмә ине. Шу­ға ҡарамаҫтан, аһ-зар белмәйсә иңенә йөкмәтелгән бурыс­тарҙы дәрт менән атҡарып, урындағы халыҡҡа шәфҡәт нурын өләште ул.

Алтын көҙ башында ауылдың үҙәгендә “Һаулыҡ һаҡлау” милли проекты буйынса төҙөлгән, заман талаптарына яуап биргән яңы фельдшер-акушерлыҡ пункты асылғас, ошо төбәктә 25 йыл ғүмерен фельдшер һөнәренә бағышлаған Гөлшат Яхъя ҡыҙының һәм, әлбиттә, Юлдыбай ауылы халҡының ҡыуанысының сиге булманы.

– Эш урыны хәҙер йылы, яҡты. Медицина ҡорамалдары ла өр-яңы. Бөтә уңайлыҡтары булған ФАП-та кешеләрҙе ҡабул итеүе лә күңел­лерәк, медицина ярҙамы артынан килеүселәр, дауаланыу курстары үтергә теләк белдереүселәр һаны ла бермә-бер артты. Тик коронавирус кеүек аяуһыҙ заман сире генә ауылдаштарҙы, яҡындарҙы урап үтһен инде, – ти хәстәрлекле, тәжрибәле фельдшер.

Был тынғыһыҙ осорҙа медицина белгестәре иңенә тауҙай эштәр, яңы бурыстар, өҫтәмә яуаплылыҡ йөкмәтелде. Урындарҙа Гөлшат Яхъя ҡыҙы кеүек халыҡтың уң ҡулына, ярҙамсы-кәңәшсеһенә әүерелгән намыҫлы хеҙмәткәрҙәр барлығы күңелде тынысландыра, киләсәккә өмөт уята.

Күгәрсен районы.