+21 °С
Болотло
Сәләмәт булайыҡ
22 Март 2021, 07:00
Вакцина яһатырға... сауҙа үҙәгенә
Мобиль вакцинация пункттары Өфө һәм Стәрлетамаҡ сауҙа үҙәктәрендә асыласаҡ.
Шулай итеп, коронавирус менән көрәш башланыуға бер йылдан ашыу ваҡыт үтеп тә китте. Был көрәштең иң һөҙөмтәле юлы – вакцина икәне һәр кемгә аңлашыла. Әле республикала нисә кешегә прививка ҡуйылған? Был турала Хөкүмәттә үткән оператив кәңәшмәлә билдәле булды.
Вице-премьер – һаулыҡ һаҡлау министры Максим Забелин белдереүенсә, ошо көндәрҙә йәнә 8400 доза вакцина килгән. Уларҙы Башфармация келәттәренән медицина учреждениеларына тарата башлағандар ҙа.
Дөйөм һандарға килгәндә, Башҡортостанда йәшәгән 118 мең кеше вакцинаның беренсе компонентын һалдырған.
- Был беҙгә килгән вакцинаның 90,4 проценты. Икенсе компонентты 76 мең кеше яһатты. Башҡорт дәүләт опера һәм балет театрында вакцинацияның мобиль пункты эшләй. Ул үҙенең һөҙөмтәлелеген күрһәтте, бер аҙна эсендә унда 576 кеше прививка яһатты, - тине Максим Забелин.
Оператив кәңәшмәлә билдәле булыуынса, был аҙнала ошоноң кеүек мобиль вакцинация пункттары Өфө һәм Стәрлетамаҡ сауҙа үҙәктәрендә асыласаҡ. Өфөлә был – “Мега”, “Планета” сауҙа үҙәктәре һәм “Башҡортостан” лайф-стайл үҙәге, Стәрлетамаҡта – “СитиМолл” сауҙа үҙәге.
Фото: utv.ru
