Бесәй аҫрағандар оҙағыраҡ йәшәй...

Бесәйҙәрҙең хужаларын йөрәк өйәнәгенән һәм гипертония кризынан ҡотҡарыуҙарын раҫлаған бик күп хәл-ваҡиғалар бар. Бесәй хатта өйәнәк була­сағын да иҫкәртә ала. Хужа­һының асыу-ярһыулы, көсөр­гәнешле мәлен һиҙеп, уның хәлен еңеләйтмәксе булып, уға һыйына, иркәләй. Кешелә миокард инфарктының ҡабатланыу хәүефен кәметә. Бесәйегеҙҙе бер нисә минут иркәләп һыйпау менән ҡан баҫымығыҙ һәм пуль­сығыҙҙың нормаға килеүен тойорһоғоҙ. Был йән эйәһе арыу-талсы­ғыуҙы, стрестарҙы ҡул менән һыпырып ташла­ғандай бөтөрә, иң яҡшы психотерапевт та, невропатолог та улар! Йоҡоһоҙлоҡ, депрессия борсоһа, өйөгөҙҙә бесәй тотоғоҙ. Айырыуса оҙон йөнлө себер, ангор, мысыр һәм башҡа тоҡомлолары – иң яҡшы “табиптар”. Ҡара төҫтәгеләре һеҙ­ҙең кире энергияғыҙҙы һурып алыр, ерәндәре ыңғай көс-ҡеүәт бирер, һорғолт-күкһелдәре тынысландырыр. Аҡ төҫтәгеләре бөтә күрһәткестәр буйынса ла өҫтөн, иң яҡшы дауалаусы улар. Бесәйҙәрҙең 4-16 герц йышлығындағы мырылдауы иммунитетҡа ыңғай йоғонто яһай. Ғалимдарҙың әйтеүенсә, мырылдау, ультратауыш менән дауалағандағы кеүек, йәрәхәт­тәрҙең тиҙерәк уңалыуына, һө­йәктәрҙең нығыуына булышлыҡ итә. Мысыр бесәйҙәренең быуын ауыртыныуын һәм остеохондроз билдәләрен еңеләй­теүе билдәле.

Геронтология институты ғалимдары бесәйҙәрҙең кеше ғүмеренә тәьҫирен өйрәнгән һәм шундай һығымтаға килгән: ғүмер буйы йорттарында ошо йомшаҡҡайҙарҙы тотҡан кеше­ләр, был йән эйәһен үҙһен­мәгәндәргә ҡарағанда, уртаса 10,3 йылға күберәк йәшәй. Биоэнергетиктар фекеренсә, бесәй – ысын энергия-мәғлүмәт приборы. Әгәр ул йыш ҡына хужа­һының башына ятырға тырыша икән, кешелә гипертония булыуы йәки уның баш ауыртыуынан яфаланыуы ихтимал. Һул яҡ яурынығыҙ тирәһенә ятырға тырышһа, йөрәгегеҙҙе тикшер­тегеҙ. Бөйөрөгөҙҙөң борсоуын һиҙһә, бесәйегеҙ мотлаҡ биле­геҙҙе йылытасаҡ. Был ғәжәп йән эйәләре хаҡында әллә күпме һөйләргә булыр ине...