Райондарҙа ла эш әүҙем бара

Шулай итеп, 6 апрелгә ҡарата Башҡортостанға 220592 доза ГамКОВИДВак вакцинаһы килгән. 150 вакцинациялау пунктында уның I компонентын 156487 кешегә яһағандар. Тулыһынса вакцинация­лауҙы (I компонент + II компонент) 103851 кеше үткән.

Әлеге ваҡытта Өфө һәм Стәрле­тамаҡ ҡалаларында COVID-19-ҙан вакцинациялауҙың биш мобиль пункты эшләй. Уларҙың дүртеһе баш ҡалала: Башҡорт дәүләт опера һәм балет театрында, “Мега”, Планета” сауҙа үҙәктәрендә, “Башҡортостан” лайфстайл үҙәгендә һәм Стәрлетамаҡта “СитиМолл” сауҙа үҙәгендә.

Мобиль пункттарҙа йәмғеһе 3984 кешегә прививка яһалған. Уларҙың эш графигы түбәндәгесә: эш көндәрендә 13.00 – 20.00 сәғәттәрҙә; ял көндәрендә (байрам көндәре лә иҫәпкә инә) 10.00 – 19.30 сәғәттәрҙә. Башҡорт дәүләт опера һәм балет театрында эш көндәрендә 10.00 – 19.30 сәғәттәрҙә прививка яһатырға мөмкин.

Республикалағы райондарҙа ла Covid-19-ҙан вакцина яһау әүҙем бара. Ял һәм байрам көндәрендә Белорет, Йылайыр, Күмертау, Федоровка, Мәләүез, Кушнаренко, Нефтекама ҡалалары-район үҙәктәрендәге ҙур майҙандарҙа мобиль пункттар эшләй. Прививка яһау бригадалары бәғзе райондарҙа ауылдар буйлап та сыға.

Нефтекама ҡалаһында йәшәүсе Людмила Михайловна ла коро­навирусҡа ҡаршы прививка яһатҡан. Әйтеүенсә, уларҙың ғаиләһендә вакцинаны күптән көткәндәр.

– Быға тиклем йыл һайын киҙеүҙән, пневмококк инфекцияһына ҡаршы вакцина яһата инек. Хәҙер иһә корона­ви­русҡа ҡаршы ла эшләттек һәм шатбыҙ, сөнки алда яҙғы эштәр, баҡса көтә. Беҙгә ауырырға ярамай, ә вакцина был йәһәттән ярҙам итәсәк, – ти ул.