+21 °С
Болотло
Сәләмәт булайыҡ
20 Май 2021, 15:30
Иртәгә - сәләмәтлек байрамы
"Халыҡ сәләмәтлеге көндәре"ндә һәр кемгә һаулығын тикшертеү һәм белгестәр консультацияһын алыу мөмкинлеге буласаҡ.
21 майҙа баш ҡаланың В.И. Ленин исемендәге паркында “Халыҡ сәләмәтлеге көндәре” байрамы уҙасаҡ. Был сарала һәр кемгә һаулығын тикшертеү һәм белгестәр консультацияһын алыу мөмкинлеге буласаҡ.
Парк биләмәһе бер нисә өлөшкә бүленәсәк. “Оҫталар ҡалаһы” биләмәһендә һүрәт төшөрөү, йомшаҡ уйынсыҡтар тегеү, аксессуарҙар эшләү буйынса оҫталыҡ дәрестәре үткәреү ҡаралған. Йәрминкәлә иһә төрлө тәмлекәстәр, дизайнерҙар теккән әйберҙәр, биҙәүестәр һәм башҡа кәрәк-яраҡ алып буласаҡ.
Медицина иҫкәртеүе үҙәге сәләмәт туҡланыу үҙенсәлектәре менән таныштырасаҡ, темаға ярашлы брошюралар таратасаҡ.
“Сәләмәтлек фонтаны” янында ҡаланың төрлө поликлиникалары (шул иҫәптән стоматология), психотерапевтик үҙәк, табип-физкультура диспансеры, СПИД үҙәге, страховкалау компаниялары һәм башҡа медицина учреждениелары палаткалары торасаҡ. Бында белгестәр менән кәңәшләшеү, төрлө тикшереүҙәр үтеү мөмкинлеге булдырыла.
“Сәләмәт туҡланыу фонтаны” янында байрамға килгәндәргә урындағы етештереүселәр арзан хаҡҡа төрлө файҙалы ризыҡтар тәҡдим итәсәк.
Байрамда спорт һәм ижади коллективтарының сығыш яһауы көтөлә. Шулай уҡ бында теләгән һәр кем ҡан баҫымын үлсәтә, Республика кардиология үҙәге белгестәре консультацияһын ала аласаҡ.
Республика Ҡан ҡойоу станцияһының махсус модулендә иһә ҡан тапшырыу мөмкинлеге булдырыла.
Сәләмәтлек үҙәктәре һәм Республика Ҡан ҡойоу станцияһы белгестәре 12.00 сәғәттән эшләй башлай. Концерт программаһы - 14.00 сәғәттән.
Фото: дюсш-сысерть.рф
