“Сәләмәтлек поездары” – юлда!

“Сәләмәт республика – сәләмәт төбәк” акцияһында Сәләмәтлек үҙәктәре һәм фельдшер-акушерлыҡ пункттары, Ғ. Ҡыуатов исемендәге республика дауаханаһының һәм республика кардиология үҙәгенең флюорографтар һәм маммографтары, диагностик үҙәктәр, республика стоматология поликлиникаһы модуле ҡатнаша. Акция барышында республиканың бөтә райондары солғап алынасаҡ, ауыл кешеләре белгестәр менән кәңәшләшә, тикшереү үтә һәм тәүге медицина ярҙамы аласаҡ.

Ошо көнгәсә 14832 кеше табиптар тарафынан ҡабул ителгән, 10412 медицина тикшеренеүе үткәрелгән, шул иҫәптән 6956 флюорография һәм 3456 маммография тикшереүе.

Табиптар 658 кешенең ҡанында глюкоза кимәленең, 764 кешелә холестериндың күтәренке булыуын асыҡлаған. 1435 граждандың ҡан баҫымы юғары булыуын, 822 кешенең тән ауырлығы норманан артыҡ булыуын билдәләгәндәр. 499 социаль әһәмиәтле сир табылған, уларҙың араһында шәкәр диабеты (51), туберкуле (4), гипертония (337) менән сирләүселәр бар. Бер кешелә миокард инфаркты асыҡланған. Уларҙың барыһы ла контролгә алынған һәм диагнозды теүәл асыҡлау өсөн медицина учреждениеларына ебәрелгән.

Бригадалар график буйынса алты районда эшләй.Өфө маршруты 24 майҙан Өфө районында, Дыуан маршруты 24-28 майҙа Ҡыйғы районында, Нефтекама маршруты 24-25 майҙа Балтас районында, Октябрьский маршруты 24-28 майҙа Баҡалы районында, Стәрлетамаҡ маршруты (24-28 майҙа) Ишембай районында, Белорет маршруты (21-28 майҙа) Учалы районында эш башлай.

Акция барышында 1933 кеше вакцинацияның беренсе этабын үтте, ә 573 кеше икеһен дә яһатырға өлгөрҙө.

Фото: Һаулыҡ һаҡлау министрлығы.